Mədəniyyət Nazirliyinin Aparatına yeni rəhbər təyin edilib

Hikmət Mustafayev Azərbaycanın Mədəniyyət Nazirliyinin Aparat rəhbəri təyin edilib. Bu barədə Mədəniyyət Nazirliyi məlumat yayıb.

Bildirilib ki, təyinat nazir Adil Kərimlinin müvafiq əmri ilə həyata keçirilib.

1971-ci il təvəllüdlü Hikmət Mustafayev 1993-cü ildə Azərbaycan İnşaat Mühəndisləri Universitetini, 2006-cı ildə isə Azərbaycan Dövlət İqtisad Universitetini bitirib.

Mustafayev 1997-ci ildən dövlət qulluğunda çalışır. O, Dövlət Əmlak Komitəsi, İqtisadi İnkişaf Nazirliyi və Əmlak Məsələləri Dövlət Komitəsində müxtəlif rəhbər vəzifələrdə fəaliyyət göstərib.

O, həmçinin COP29 Azərbaycan Əməliyyat Şirkətində Aparat rəhbəri olub. Təyinatadək Heydər Əliyev Mərkəzinin direktorunun müşaviri vəzifəsində çalışıb.

Mustafayev dövlət qulluğunda uzunmüddətli fəaliyyətinə görə 2019-cu ildə Prezident İlham Əliyevin sərəncamı ilə “Tərəqqi” medalı ilə təltif edilib. O, dövlət qulluğunun baş müşaviridir.