“Cücələrim”in bəstəkarının ad günüdür

Bu gün məşhur "Cücələrim” mahnısının bəstəkarı əməkdar incəsənət xadimi Qəmbər Hüseynlinin dünyaya gəlməsinin 99-cu ildönümüdür.

Bəstəkar 1916-cı ilin bu günü Gəncədə ziyalı ailəsində dünyaya gəlib. Qəmbər həmyaşıdlarından qeyri adi yaddaşı ilə seçilirdi. Musiqiyə böyük həvəsi var idi. El şənliklərində Cabbar Qaryağdıoğlu, Seyid Şuşinski, Bülbülün ifalarını dinlədikcə müsiqiyə daha da bağlanır. Gəncədə musiqi məktəbinin tar şöbəsini bitirən Qəmbər Hüseynli Bakıya gələrək Asəf Zeynallı adına musiqi texnikumuna daxil olur.

Qəmbər Hüseynlinin tarda "Segah”, "Şur” və "Zabul” və digər muğamları yüksək peşəkarlıqla ifa bacarığı başqalarından fərqlənirdi. Qəmbər Hüseynlinin "Muğana ceyran”, "Tellər oynadı”, "İlk məhəbbət”, "Ay işığında”, "Gecələr uzanaydı” mahnılarında insanı heyrətləndirən elementlər zəngindir. Ona görə də, bu melodiyaları dinləmək adamı bezdirmir. Əksinə bu mahnılar adamı sevib-sevilməyə, işıqlı sabahlara səsləyir və xoş əhval-ruhiyə yaradır. Bunun üçün təkcə "Cücələrim” mahnısını misal çəkmək kifayətdir. Cücələrim demək olar ki, dünyanın hər yerində səslənib və 100-dən artıq dildə ifa edilib.

Qəmbər Hüseynli musiqinin bütün janrlarında yazıb. O, "Ailə namusu”, "Şeyx Sənan”, "Dağılan tifaq”, "Almaz” və sair bu kimi səhnə əsərlərinə də musiqi yazıb. 100-dən çox romansın müəllifidir. Qəmbər Hüseynlinin musiqiləri Şövkət Ələkbərova, İslam Rzayev, Sara Qədimova kimi sənətkarlarımızın ifasında dinləyici məhəbbəti qazanıb. İndi də elə bir müğənni tapılmaz ki. "Muğana ceyran”, "İlk məhəbbət”, "Ay işığında” mahnılarına bigənə qalsın. Qəmbər Hüseynli nağılabənzər ömür yaşadı. 1961-ci il avqustun 1-də vəfat etdi və 45 illik ömründə əsrlərlə yaşayacaq səhifə açdı.//ANS