ABŞ səfiri Azərbaycanda hamam bərpa etdirdi

ABŞ səfirlərinin Mədəni İrsin Qorunması Fondu Quba şəhərində tarixi "Hündür günbəzli hamam"ı bərpa edib.

İstiPress-in şimal bürosunun məlumatına görə, hamam Amerika səfirlərinin Mədəni İrsin Qorunması Fondunun maliyyə dəstəyilə və Azərbaycanın Mədəniyyət və Turizm Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətilə birgə bərpa edilib.

Açılış mərasimində ABŞ-ın Azərbaycandakı səfiri R.Sekuta və xanımı, mədəniyyət naziri Əbülfəz Qarayev, Quba icra başçısı Ziyəddin Əliyev, ictimaiyyət nümayəndələri iştirak edib. Çıxışlarda bildirilib ki,18-ci əsrin sonu və 19-cu əsrin əvvəllərində şərq memarlıq üslubunda -qırmızı kərpicdən inşa edilmiş bu tarixi hamam Nazirlər Kabinetinin qərarı ilə yerli daşınmaz tarix və mədəniyyət abidələri siyahısına daxil edilib.

Hamamın binasının fasad, dam, divar, pilləkən hissəsi və otaqları yenilənərək əsaslı bərpa edilib, ətrafı hasarlanıb. Ərazidə xüsusi bərpa işləri görülüb.Açılış mərasimində qeyd olunub ki, vaxtilə hamam kimi fəaliyyət göstərmiş bu tarixi abidə indi hamam statusu daşımayacaq, vətəndaşlara, sakin və turistlərə açıq olacaq. Burada yerli sənətkarların əl işlərindən ibarət sərgilər, müxtəlif tədbirlər keçiriləcək.

İştirakçıların diqqətinə çatdırılıb ki, 2001-ci ildən fəaliyyətdə olan Amerika səfirlərinin Mədəni İrsin Qorunması Fondu indiyədək 100-dən çox ölkədə müxtəlif qədim və tarixi binaların, nadir əlyazma və muzey kolleksiyalarının , bir sözlə, məhv oımaq təhlükəsində olan mədəni abidələrin bərpasına dəstək verib və xeyirxah missiya bundan sonra da uğurla davam etdiriləcək.