Arzuxan Əlizadə: Məhkəmə qərarlarının yalnız 50 faizi icra olunur

Məhkəmə qərarlarının icrası sahəsində ciddi problemlər var. Bunu Milli Məclisin deputatı Arzuxan Əlizadə deyib. 

 Onun sözlərinə görə, hazırda qəbul edilən məhkəmə qərarlarının təxminən 50 faizi icra olunur.

“Bu, bizim komitəmizin səlahiyyətlərinə aid olan məsələdir. İnsanlar işə bərpa və digər hüquqi tələblərlə bağlı məhkəmələrə müraciət edirlər, lakin qərarların tam şəkildə icrası hələ də problem olaraq qalır,” –  Əlizadə qeyd edib.

Deputat bu vəziyyətin hüquq sisteminə olan inama mənfi təsir etdiyini və məsələnin ciddi şəkildə araşdırılmalı olduğunu vurğulayıb.

Deputat Zahid Oruc cavab olaraq bildirib ki, icra olunmayan məhkəmə qərarların böyük hissəsi bank kreditləri ilə bağlıdır.

"Nə qədər ki, banklar təminatı olmayan kreditlər verəcəklər bu proses belə də davam edəcək. İcra olunmayan 340 mindən artıq qərar kreditlərlə bağlıdır. Bu problemin qarşısını almaq lazımdır. Hər halda bank o kreditləri verəndə bilirdi ki, o pul geri qayıtmayacaq", - deputat bildirib. 

Gülnar Nazimqızı