Ombudsman: Yeni amnistiya təşəbbüsü humanist cəza siyasətinin davamıdır

Prezident İlham Əliyev tərəfindən yeni amnistiya aktı ilə bağlı qanun layihəsinin Milli Məclisə təqdim edilməsi təşəbbüsü dövlətin ardıcıl humanist cəza siyasətinin davamıdır. Bunu Azərbaycan Ombudsmanı Səbinə Əliyeva bildirib. 

Onun sözlərinə görə, 1995–2025-ci illərdə qəbul edilən 71 əfv fərmanı və 12 amnistiya aktı minlərlə məhkumun azadlığa buraxılması ilə nəticələnib.

Dekabrın 15-də Prezident İlham Əliyev humanizm və mərhəmət prinsiplərini əsas götürərək Azərbaycanda 20 mindən çox şəxslə bağlı amnistiya elan edilməsi təşəbbüsü irəli sürüb.

Proqnozlara görə, amnistiya çərçivəsində 5 mindən çox məhkum azadlıqdan məhrumetmə cəzasından azad ediləcək, 3 mindən artıq şəxsin cəzası azaldılacaq, 7 mindən çox məhkum azadlığın məhdudlaşdırılması cəzasından, 4 minə yaxın şəxs azadlıqdan məhrumetmə ilə bağlı olmayan və ya şərti cəzalardan azad olunacaq. Bundan əlavə, mindən çox şəxs cinayət məsuliyyətindən azad edilə bilər.

Gülnar Nazimqızı