Hindistan vətəndaşlarına İranı tərk etmək tövsiyə olunub

Hindistan hökuməti ölkə vətəndaşlarını İrandakı dəyişən təhlükəsizlik vəziyyəti fonunda bu ölkəni tərk etməyə çağırıb.

Hindistanın Tehrandakı səfirliyinin sosial şəbəkələrdə yaydığı bəyanatda bildirilir ki, 5 yanvar 2026-cı il tarixli rəsmi tövsiyəyə əsasən, hazırda İranda olan Hindistan vətəndaşlarına — o cümlədən tələbələrə, zəvvarlara, iş adamlarına və turistlərə — kommersiya reysləri də daxil olmaqla, mövcud olan bütün nəqliyyat vasitələrindən istifadə etməklə ölkəni tərk etmək məsləhət görülür.

Bəyanatda hindistanlılar ehtiyatlı davranmağa, etiraz və nümayişlərin keçirildiyi ərazilərdən uzaq durmağa, həmçinin yerli media və rəsmi məlumatları izləməyə çağırılıb.

Bundan əvvəl ABŞ Prezidenti Donald Tramp, eləcə də Kanada, Yeni Zelandiya, İrlandiya, Yaponiya, Almaniya və Fransa hakimiyyət orqanları da öz vətəndaşlarına vətəndaşlarını İrana səfər etməmək və ya ölkəni tərk etmək barədə oxşar tövsiyələr vermişdi.

Tramp daha əvvəl iranlıları etirazları davam etdirməyə çağırmış və ABŞ tərəfindən dəstəyin mümkünlüyünə işarə etmişdi. Regionda gərginlik fonunda bir sıra ölkələr təhlükəsizlik risklərinin artdığını bildirərək vətəndaşlarını ehtiyatlı olmağa səsləyir.

Aytac