Ceyhun Bayramov Kaleb Orrla Azərbaycan-ABŞ münasibətlərini müzakirə edib

Azərbaycan Respublikasının xarici işlər naziri Ceyhun Bayramov ölkədə səfərdə olan ABŞ Dövlət katibinin iqtisadi, enerji və biznes məsələləri üzrə köməkçisi Kaleb Orrun rəhbərlik etdiyi nümayəndə heyəti ilə görüşüb.Bu barədə Xarici İşlər Nazirliyindən məlumat verilib.

Görüşdə Azərbaycan–ABŞ münasibətlərinin hazırkı vəziyyəti və perspektivləri, o cümlədən iqtisadiyyat, enerji təhlükəsizliyi, nəqliyyat-kommunikasiya, investisiya və ticarət sahələrində əməkdaşlıq müzakirə olunub.

Tərəflər Azərbaycan ilə ABŞ arasında imzalanmış Strateji Tərəfdaşlıq Xartiyasına uyğun olaraq əlaqələrin genişləndirilməsinin əhəmiyyətini vurğulayıblar. Həmçinin ilk iclası keçiriləcək Azərbaycan–ABŞ İqtisadi Dialoqunun ikitərəfli əməkdaşlığın inkişafında mühüm rol oynayacağı qeyd edilib.

Görüşdə enerji sahəsində uzunmüddətli əməkdaşlıq və Azərbaycanın regional enerji təhlükəsizliyinə töhfəsi diqqətə çatdırılıb. Eyni zamanda bərpa olunan enerji, yaşıl keçid, innovasiyalar və yüksək texnologiyalar üzrə əməkdaşlıq imkanları nəzərdən keçirilib.

Tərəflər Orta Dəhliz və regional nəqliyyat-logistika layihələrinin inkişafı, eləcə də Azərbaycanda investisiya mühitinin yaxşılaşdırılması məsələlərini müzakirə ediblər.

Ötən ilin avqustunda Vaşinqton sammitindən sonra əldə edilən razılaşmalar və kommunikasiya xətlərinin açılması perspektivləri də görüşdə gündəmdə olub