Azərbaycan və Pakistan ticarəti genişləndirmək üçün böyük potensiala malikdir - Hikmət Hacıyev

Azərbaycan və Pakistan arasında ticarət-iqtisadi əlaqələrin daha da genişləndirilməsi üçün əhəmiyyətli potensial mövcuddur.Bunu  Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev "Pakistan TV"yə müsahibəsində bildirib.

Onun sözlərinə görə, bu potensialın reallaşdırılması üçün işgüzar dairələr arasında təmaslar genişləndirilməli, investisiya imkanları barədə məlumatlılıq artırılmalı və özəl sektorlar arasında əməkdaşlıq gücləndirilməlidir.

Hacıyev Azərbaycan və Pakistan münasibətlərini qarşılıqlı etimada və davamlı dəstəyə əsaslanan strateji tərəfdaşlıq kimi xarakterizə edib. O bildirib ki, iki ölkə rəhbərləri arasında mövcud olan qarşılıqlı anlaşma ikitərəfli əməkdaşlığın müxtəlif istiqamətlərdə inkişafına töhfə verir.

"Azərbaycan və Pakistan arasında siyasi və geostrateji münasibətlər yüksək səviyyədədir", – Prezidentin köməkçisi qeyd edib.

Hacıyev birbaşa aviareyslərin sayının artmasının qarşılıqlı turizm səfərlərinə müsbət təsir göstərdiyini, mədəni əlaqələrin və xalqlar arasında təmasların daha da inkişaf etdirilməsinin vacibliyini vurğulayıb.

Media sahəsində əməkdaşlığa toxunan Prezidentin köməkçisi Pakistan jurnalistlərinin Şuşa Qlobal Media Forumunda ilk tədbirdən etibarən fəal iştirak etdiklərini bildirib. Onun sözlərinə görə, forum Şuşanın beynəlxalq intellektual və mədəni dialoq məkanı kimi rolunun bərpası, eləcə də dezinformasiya, süni intellekt və strateji kommunikasiyalar kimi aktual media mövzularının müzakirəsi məqsədilə yaradılıb.

Hikmət Hacıyev Pakistan və Azərbaycan mediası arasında əməkdaşlığın genişlənməsini müsbət qiymətləndirərək bildirib ki, jurnalist mübadiləsinin intensivləşməsi iki qardaş xalq arasında qarşılıqlı anlaşma və dostluğun möhkəmlənməsinə xidmət edəcək.

Prezidentin köməkçisi, həmçinin Yaxın Şərqdə son gərginlik zamanı Pakistanın vasitəçilik səylərini yüksək qiymətləndirib. Onun sözlərinə görə, İslamabad gərginliyin azaldılması və dialoqun təşviqi istiqamətində məsuliyyətli mövqe nümayiş etdirərək regional sülhün qorunmasına töhfə verib.

H.Hacıyev bildirib ki, Pakistanın konstruktiv fəaliyyəti ölkənin qlobal proseslərdə artan geostrateji rolunu və regional, eləcə də beynəlxalq sabitliyə sadiqliyini nümayiş etdirir.