Hikmət Hacıyev TADİV nümayəndə heyəti ilə görüşüb

Azərbaycan Respublikası Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Türkiyə–Azərbaycan Dostluq, Əməkdaşlıq və Həmrəylik Vəqfinin (TADİV) və Mədəniyyətlərarası Şəbəkə Dərnəyinin nümayəndə heyətini qəbul edib.

Prezident Administrasiyasının verdiyi rəsmi məlumata görə, media nümayəndələrinin iştirakı ilə keçirilən görüş TADİV-in Azərbaycanda təşkil etdiyi proqram çərçivəsində baş tutub. Hikmət Hacıyev çıxışında Azərbaycan–Türkiyə münasibətlərinin strateji müttəfiqlik və qardaşlıq prinsipləri əsasında inkişaf etdiyini vurğulayıb. O, Prezident İlham Əliyevin iki ölkə arasındakı qardaşlıq münasibətlərinə dair yanaşmasının strateji tərəfdaşlığın ana xəttini təşkil etdiyini bildirib.

Təxminən üç saat davam edən geniş tərkibli görüşdə Prezidentin köməkçisi iştirakçıların regional təhlükəsizlik, media əməkdaşlığı və ikitərəfli əlaqələrin gələcək perspektivlərinə dair çoxsaylı suallarını ətraflı cavablandırıb.

N.Təbrizli