MSK sədri Qazaxıstanda növbədənkənar parlament seçkilərini müşahidə edəcək

Mərkəzi Seçki Komissiyasının (MSK) sədri Məzahir Pənahovun rəhbərlik etdiyi nümayəndə heyəti avqustun 23-də Qazaxıstanda keçiriləcək növbədənkənar parlament seçkilərini beynəlxalq müşahidəçi qismində izləmək üçün bu ölkəyə səfər edib. Bu barədə MSK məlumat yayıb.

Nümayəndə heyətinin seçki gününədək seçkilərə hazırlıq prosesi və seçki komissiyalarının fəaliyyəti ilə tanış olması, səsvermə günü isə Astanadakı seçki məntəqələrində səsvermə prosedurlarını müşahidə etməsi nəzərdə tutulur.

MSK təmsilçiləri avqustun 22-də Astanada keçiriləcək Türk Dövlətləri Təşkilatına üzv ölkələrin ali seçki qurumlarının Məşvərət Platformasının iclasında da iştirak edəcəklər.

İclasda seçki administrasiyaları arasında əməkdaşlıq, qabaqcıl təcrübələrin mübadiləsi və institusional əlaqələrin gücləndirilməsi məsələləri müzakirə olunacaq.

Səfər çərçivəsində Məzahir Pənahovun Qazaxıstan Mərkəzi Seçki Komissiyasının sədri Nurlan Abdirov, digər ölkələrin seçki qurumlarının rəhbərləri və beynəlxalq müşahidə missiyalarının təmsilçiləri ilə görüşləri də planlaşdırılır.