Azərbaycan və Ermənistan Laçında elektrik enerjisi mübadiləsini müzakirə edib

Azərbaycan və Ermənistan Laçında elektrik enerjisinin idxalı və ixracı imkanlarını, həmçinin iki ölkənin enerji sistemlərinin dövlət sərhədində əlaqələndirilməsi məsələsini müzakirə edib.

Azərbaycan Nazirlər Kabinetinin məlumatına görə, avqustun 25-də Laçın şəhərində Azərbaycanın Energetika Nazirliyi və “Azərenerji” ASC ilə Ermənistanın Ərazi İdarəetmə və İnfrastruktur Nazirliyi və “Elektrik Enerjisi Sisteminin Operatoru” şirkətinin nümayəndələri arasında işgüzar görüş keçirilib.

Görüşdə iki ölkə arasında elektrik enerjisi mübadiləsinin mümkünlüyü və bunun üçün enerji infrastrukturlarının sərhəddə əlaqələndirilməsinin variantları nəzərdən keçirilib.

Bu, Azərbaycan və Ermənistan arasında enerji sahəsində praktiki əməkdaşlıq imkanlarının müzakirə edildiyi görüşlərdən biridir. Görüşün keçirilməsi tərəflər arasında kommunikasiyaların və iqtisadi əlaqələrin inkişafı üzrə təmasların davam etdiyini göstərir.