Polşanın Azərbaycandakı səfiri XİN-ə çağrılıb

Polşanın Azərbaycandakı fövqəladə və səlahiyyətli səfiri Pavel Radomski Xarici İşlər Nazirliyinə (XİN) çağırılıb.Bu barədə XİN məlumat yayıb.

Görüşdə avqustun 26-da Polşanın ictimai yayım qurumu TVP-nin (TVP World) "Eastern Express" proqramında Azərbaycan əleyhinə yayımlanan süjetlə bağlı etiraz bildirilib.

XİN-dən verilən məlumata görə, süjetdə Azərbaycan dövləti və ölkə rəhbərliyinə qarşı qərəzli və qəbuledilməz iddialar səsləndirilib, verilişin aparıcısının davranışı isə təxribat xarakterli qiymətləndirilib. Bununla əlaqədar Polşa tərəfinə etiraz notası təqdim olunub.

Azərbaycan tərəfi bildirib ki, Azərbaycan-Ermənistan arasında normallaşma və sülh prosesinin davam etdiyi, həmçinin regionda davamlı sülh, sabitlik və təhlükəsizliyin təmin olunması istiqamətində səylərin göstərildiyi bir vaxtda həqiqəti təhrif edən məlumatların yayılması suallar doğurur.

XİN Polşa hökuməti tərəfindən maliyyələşdirilən ictimai yayım qurumunda Azərbaycana qarşı mənfi məzmunun yayımlanmasını iki ölkə arasında tərəfdaşlıq münasibətlərinin ruhuna zidd və ikitərəfli əlaqələrə zərər vura biləcək qeyri-dost addım kimi qiymətləndirib.

Polşa tərəfi Azərbaycanı hədəf alan bu cür kampaniyaların dayandırılması üçün təxirəsalınmaz və təsirli tədbirlər görməyə çağırılıb.