Prezident İlham Əliyev İƏT-in yeni baş katibini təbrik edib

 Prezident İlham Əliyev İslam Əməkdaşlıq Təşkilatının (İƏT) Baş katibi vəzifəsinə seçilən İsmail Uld Şeyx Əhmədə təbrik məktubu ünvanlayıb.

Məktubda dövlət başçısı İƏT-in baş katibi vəzifəsinə seçilməsi münasibətilə İsmail Uld Şeyx Əhmədi təbrik edib və ona fəaliyyətində uğurlar arzulayıb.

İlham Əliyev Azərbaycanın İƏT ilə əməkdaşlığa xüsusi önəm verdiyini bildirib. O qeyd edib ki, Azərbaycanın təşkilata üzv olduğu 35 il ərzində İƏT-in fəaliyyətində təşəbbüskar və məsuliyyətli rol oynayıb, islam həmrəyliyinin gücləndirilməsinə və təşkilatın beynəlxalq nüfuzunun artırılmasına töhfə verib.

Prezident Ermənistanın Azərbaycana qarşı təcavüzü və postmüharibə dövründə İƏT-in mövqeyini də yüksək qiymətləndirib. Məktubda qeyd olunub ki, təşkilat Azərbaycanın ərazi bütövlüyünü və suverenliyini dəstəkləyən, Ermənistanın işğalını pisləyən, həmçinin azad edilmiş ərazilərdə aparılan bərpa və quruculuq işlərini alqışlayan qətnamə və bəyanatlar qəbul edib.

İlham Əliyev Azərbaycan-İƏT əməkdaşlığının bundan sonra da inkişaf edəcəyinə əminliyini ifadə edib və Azərbaycanın 2027-ci ildə İslam Zirvə Konfransının 16-cı sessiyasına, eləcə də İnformasiya Nazirlərinin İslam Konfransının 13-cü sessiyasına və digər tədbirlərə ev sahibliyi edəcəyini bildirib.

Prezident yeni baş katiblə bu istiqamətdə sıx və səmərəli əməkdaşlığa ümid etdiyini vurğulayıb.

İƏT 57 üzv dövləti birləşdirən beynəlxalq təşkilatdır. Azərbaycan 1991-ci ildən təşkilatın üzvüdür və onun çərçivəsində siyasi, iqtisadi, humanitar və digər istiqamətlərdə əməkdaşlıq edir.