Babaoğlu: Hələb və İraq türkmənlərinin dili də nəzərə alınmalıdır

Deputat Hikmət Babaoğlu xarici ölkələrdə Azərbaycan dilinin vəziyyəti ilə bağlı müzakirələrdə Hələb və İraq türkmənlərinin də nəzərə alınmasının vacib olduğunu açıqlayıb. 

O, Milli Məclisin İnsan hüquqları komitəsinin iclasında çıxışı zamanı Azərbaycanın Suriya ilə münasibətlərində son dövrlərdə yeni mərhələnin yarandığını qeyd edib.

“Azərbaycanın son dövrlərdə Suriya Respublikası ilə çox yaxşı münasibətləri qurulub. Biz ora kömək etdik. Bu, Azərbaycan Prezidentinin xarici siyasətində yeni bir istiqamət oldu. Amma biz bunu, əlbəttə ki, elə-belə etmədik. Bunun bir səbəbləri vardı və bu, Azərbaycan dövlətinin xarici siyasətidir”, - Babaoğlu deyib.

Deputat Hələbin Azərbaycanın tarixi şəhəri olduğunu və Nəsiminin məzarının burada yerləşdiyini vurğulayıb.

“Hələb bizim şəhərimizdir, tarixi şəhərimizdir. Mən bunu bu gün ərazi iddiası kimi demirəm. Hələb bizim tarixi şəhərimizdir. Nəsiminin qəbri vətəndir”, - o bildirib.

Babaoğlu Azərbaycanın 44 günlük müharibə zamanı Bayırbucaq və Hələb türkmənlərindən mənəvi dəstək gördüyünü də qeyd edib.

Deputat bildirib ki, xarici ölkələrdə Azərbaycan dilinin vəziyyəti araşdırılarkən Hələb və İraq türkmənlərinin dil məsələsi də nəzərə alınmalıdır.

“Suriyanın türklərinin dili haqqında “türk dili” deyəndə mənə elə gəlir ki, bir qədər dolğun olmur. Hələb türkmən dili elə Azərbaycan dilidir. İraq türkmən dili elə Azərbaycan dilidir. Xarici ölkələr kateqoriyasına mən düşünürəm ki, bunları da əlavə etmək lazımdır”, – Babaoğlu deyib.

O əlavə edib ki, Azərbaycanın mədəni arealının müxtəlif hissələrində dil və mədəniyyət məsələlərinə diqqət yetirilməlidir.

Gülnar Nazimqızı