Dövlət Xidməti “Telegram” və “WhatsApp”la bağlı araşdırmalar aparır

Elektron Təhlükəsizlik Xidməti (Milli CERT) “Telegram” və “WhatsApp” ani mesajlaşma tətbiqi üzrə son dövrlərdə istifadəçi hesablarının icazəsiz ələ keçirilməsi hallarının artması ilə bağlı araşdırmaları davam etdirir.Bu barədə ETX-dan məlumat verilib.

Bildirilib ki,daxil olan müraciətlərin və aşkarlanmış faktların təhlili göstərir ki, bir çox istifadəçi əlavə təhlükəsizlik mexanizmlərindən yararlanmır. Bu səbəbdən vətəndaşlara hər iki platformada iki mərhələli təsdiqləmə funksiyasını aktivləşdirmək tövsiyə olunur.

Məlumata görə, “Telegram”da iki mərhələli təsdiqləməni aktivləşdirmək üçün istifadəçilər “Ayarlar” bölməsindən “Məxfilik və Təhlükəsizlik” hissəsinə keçərək əlavə şifrə təyin etməli və bərpa üçün elektron poçt ünvanı daxil etməlidirlər. Bu halda hesaba giriş təkcə SMS-kodla deyil, alternativ doğrulama üsulları ilə həyata keçirilir ki, bu da təhlükəsizlik risklərini azaldır.

“WhatsApp”da isə iki mərhələli təsdiqləmə “Ayarlar” bölməsində “Hesab” hissəsindən aktivləşdirilir. Burada altı rəqəmli PIN kod təyin olunur və hesabın əlavə qorunması üçün elektron poçt ünvanının daxil edilməsi tövsiyə edilir. PIN kod vaxtaşırı sorğulanaraq hesabın təhlükəsizliyini təmin edir.

Elektron Təhlükəsizlik Xidməti həmçinin bildirib ki, problemin aradan qaldırılması məqsədilə sözügedən tətbiqlərin rəsmi nümayəndələri ilə mütəmadi müzakirələr aparılır.