DTX: Kritik informasiya infrastrukturu üzrə yoxlamalarda uyğunsuzluqlar aşkarlanıb

Kritik informasiya infrastrukturunun təhlükəsizliyi üzrə ümumi və xüsusi tələblərə riayət olunması vəziyyətinin yoxlanılması məqsədilə yaradılmış Komissiyanın 2025-ci ilin yekunlarına dair iclası keçirilib.

İclasda Dövlət Təhlükəsizliyi Xidməti (DTX) və Xüsusi Rabitə və İnformasiya Təhlükəsizliyi Dövlət Xidmətinin (XRİTDX) əməkdaşlarından ibarət birgə Komissiya kritik informasiya infrastrukturunun təhlükəsizliyi üzrə cari vəziyyəti, il ərzində aparılmış yerində qiymətləndirmələrin nəticələrini, habelə mövcud kiberriskləri müzakirə edib, 2026-cı il üçün əsas funksional hədəfləri müəyyənləşdirib.

Rəsmi məlumata görə, DTX və XRİTDX əməkdaşlarının iştirakı ilə aparılan yoxlamalar zamanı bəzi subyektlərin təqdim etdiyi daxili audit hesabatları ilə faktiki vəziyyət arasında ciddi uyğunsuzluqlar aşkar olunub. Bu hal kritik informasiya infrastrukturu obyektləri üzrə kibertəhlükəsizliyin gücləndirilməsi üçün mərkəzləşmiş nəzarət mexanizmlərinin səmərəliliyinin artırılmasının zəruriliyini ön plana çıxarıb.

İclasda eyni zamanda:

normativ-hüquqi mexanizmlərin tətbiqi, il ərzində görülmüş tədbirlərin nəticələri, kibertəhdid məlumatlarının mübadiləsi, beynəlxalq əməkdaşlıq çərçivəsində əldə olunan praktik nəticələr
müzakirə olunub.

Qeyd edilib ki, mövcud çağırışlar fonunda kritik informasiya infrastrukturunun təhlükəsizliyi ilə bağlı normativ-hüquqi bazanın inkişaf etdirilməsi, xüsusilə təhlükəsizlik tələblərinin daha da sərtləşdirilməsi və təkmilləşdirilməsi vacibdir.

Gülnar Nazimqızı