Azərbaycan səfiri etimadnaməsini Pakistan Prezidentinə təqdim edib

Azərbaycanın Pakistandakı səfiri İrfan Davudov etimadnaməsini Pakistan Prezidenti Asif Əli Zərdariyə təqdim edib.Bu barədə Pakistan Prezidentinin ofisi “X” sosial şəbəkəsində məlumat yayıb.

Görüşdə Zərdari Azərbaycanla Pakistan arasında yaxın və qardaşlıq münasibətlərini vurğulayıb, ticarət və investisiya əlaqələrinin genişləndirilməsinin vacibliyini qeyd edib. O, həmçinin energetika, regional əlaqəlilik və müdafiə sahələrində əməkdaşlıq perspektivlərinə toxunub, hərbi-sənaye əməkdaşlığında əldə olunan irəliləyişi alqışlayıb.

Pakistan Prezidenti turizmin və xalqlararası əlaqələrin inkişafında birbaşa aviareyslərin əhəmiyyətini də vurğulayıb.

Həmin gün Zərdari Norveç və İsveçrənin səfirlərinin də etimadnamələrini qəbul edib. Görüşlərdə ikitərəfli münasibətlərin, o cümlədən ticarət, investisiya, energetika və texnologiyalar sahələrində əməkdaşlığın inkişafı müzakirə olunub.