“Qarabağ” Avropa Liqasında mübarizəni dayandırıb - Yenilənib

UEFA Avropa Liqasının II təsnifat mərhələsinin cavab oyununda "Qarabağ" səfərdə Bolqarıstanın ÇSKA (Sofiya) klubuna penaltilər seriyasında 4:5 hesabı ilə uduzaraq turnirlə vidalaşıb.

Sofiyadakı "Vasil Levski" stadionunda keçirilən görüşün əsas və əlavə vaxtında hesab açılmayıb. Bakıda baş tutan ilk qarşılaşma da 0:0 hesabı ilə yekunlaşdığından qalib penaltilər seriyasında müəyyənləşib. ÇSKA futbolçuları onbirmetrlik zərbələri daha dəqiq yerinə yetirərək növbəti mərhələyə yüksəlib.

Beləliklə, "Qarabağ" UEFA Avropa Liqasındakı mübarizəsini başa vurub. Ağdam təmsilçisi avrokuboklarda çıxışını UEFA Konfrans Liqasının III təsnifat mərhələsində davam etdirəcək və bu raundda Ukraynanın "Dinamo" (Kiyev) klubu ilə üz-üzə gələcək. UEFA Konfrans Liqasının III təsnifat mərhələsinin oyunları avqustun 6 və 13-də keçiriləcək. 

***

UEFA Avropa Liqasının II təsnifat mərhələsinin ÇSKA (Sofiya, Bolqarıstan) - "Qarabağ" oyunu başlayıb.

Qarşılaşma "Vasil Levski" stadionunda keçirilir.

Görüşü belçikalı FIFA referisi Brem van Drisş idarə edir.

***

UEFA Avropa Liqasının II tənsifat mərhələsinin cavab görüşündə üz-üzə gələcək Bolqarıstanın ÇSKA və "Qarabağ" kollektivlərinin start heyətləri bəlli olub.

Komandalar meydana aşağıdakı "11-lik"lərlə çıxacaqlar.

ÇSKA: Fyodor Lapouxov, Pastor, Can-Filipp Qpamen, Brunu Jordan (K), Maks Ebonq, Stefano Sensi, Santyaqo Qodoy, Teodor İvanov, Anxelo Martino, İonnis Pittas, Serxio Rodriqes

"Qarabağ": Mateuş Koxalski, Mateus Silva, Bense Varkonyi, Marko Yankoviç, Abdullah Zubir, Zakariya Savo, Kadi Borges, Aleksey Kaşuk, Pedro Bikalyo, Elvin Cəfərquliyev, Bədavi Hüseynov (K)

ÇSKA - "Qarabağ" görüşü bu gün saat 22:00-da "Vasil Levski" stadionunda start götürəcək.