Rusiya məsələni BMT-yə çıxarır

Rusiya BMT Təhlükəsizlik Şurasından xahiş edib ki, dekabrın 8-də Türkiyənin Suriya və İraqda hərbi əməliyyatlarına dair qapalı müzakirə keçirsin. Bu barədə diplomatlar məlumat yayıb.

Bu ay Təhlükəsizlik Şurasının prezidenti olan Birləşmiş Ştatlar müzakirələrə sədrlik edəcək.

Diplomatların gözləntisinə görə, Türkiyənin noyabrın 24-də Rusiya təyyarəsini vurması da müzakirə olunacaq. O vaxtdan Rusiya-Türkiyə münasibətləri gərginləşib.

İraq da suverenliyinin Türkiyə tərəfindən pozulduğunu bəyan edib. Belə ki, ötən həftə Türkiyə İraqın şimalında bir düşərgəyə əsgər və tanklar yeridib.

Rusiyanın İraq məsələsini qaldıracağı hələlik bəlli deyil.

Türkiyə İraqdan hərbçilərini çəkməyəcəyini, məqsədinin İslam Dövləti qruplaşmasına qarşı yerli qüvvələrə təlim keçmək olduğunu bildirir. /Azadliq.org