Ərdoğan ABŞ-ın ultimatumuna cavab verdi

Türkiyə prezidenti Rəcəb Tayyib Ərdoğan bəyan edib ki, Türkiyə Amerika Birləşmiş Ştatlarının (ABŞ) təzyiqlərinə baxmayaraq, S-400 Raket Əleyhinə Müdafiə (RAM) sistemləri almaq barədə Rusiya ilə bağlanmış sazişdən çıxmayacaq.
Virtualaz.org bildirir ki, Türkiyə lideri deyib: «Bizim sazişimiz var və o, hazırda reallaşır – biz, qəti fikirdəyik. S-400 almaqdan imtina etməyə hazırlaşmırıq».
Ərdoğan bir daha xatırladıb ki, Moskva özünün Raket Əleyhinə Müdafiə sistemlərinin satışı üzrə Vaşinqtonla müqayisədə daha sərfəli şərtlər təklif edib.
Qeyd edək ki, Ankaranın Rusiyadan S-400 kompleksi almaq arzusu onunla NATO üzrə müttəfiqləri və ABŞ arasında yaranmış fikir ayrılığının əsas mənbəyi sayılır. Buna görə, ABŞ Türkiyəni hətta sanksiyalarla hədələyir.
Bu gün isə ABŞ Türkiyəyə S-400 kompleksləri ilə bağlı ultimatum verib. Belə ki, ABŞ-ın NATO-dakı daimi nümayəndəsi Key Beyli Hatçinson Türkiyənin ABŞ-ın F-35 təyyarələrini əldə etməsi üçün Rusiyanın S-400 komplekslərindən imtina etməli olacağını bildirib.
O, iddia edib ki, Rusiya ABŞ və NATO-nun əsas rəqibi olduğu üçün onları zəiflətmək istəyir, bu üzdən Türkiyə ABŞ raketlərinə qarşı yaradılan silahlara malik olmamalıdır.
"Seçim sizindir. Ya birini, ya digərini seçməlisiniz”, – deyə o vurğulayıb.

www.anews.az