Avropa Komissiyası Rusiyaya qarşı 12-ci sanksiyalar paketi ilə bağlı məsləhətləşmələrə başlayacaq

Avropa Komissiyası (AK) tezliklə bir sıra Avropa İttifaqı ölkələri ilə Rusiya Federasiyasına qarşı mümkün 12-ci sanksiyalar paketinin təfərrüatları ilə bağlı məsləhətləşmələrə başlayacaq.

Bu barədə "EUobserver” məlumat yayıb.

Bu həftə sonu və ya gələn həftənin əvvəlində Avropa Komissiyası növbəti sanksiyalar paketi ilə bağlı Avropanın bir çox dövlətləri ilə bağlı qapılar arxasında məsləhətləşmələr keçirəcək.

Belə ki, "qara siyahı”ya Rusiya almazlarının alınması daxil ediləcək. Eyni zamanda, adı açıqlanmayan bir Aİ diplomatı jurnalistlərə deyib ki, "G7”də təmsil olunan Qərb dövlətləri yaxın bir neçə gün ərzində Rusiya almazlarına qadağa elan etməyə hazırdırlar.

Bu arada, Litva və Polşa artıq sanksiya təkliflərinin təfərrüatlı variantlarını təqdim ediblər. Beləliklə, Litva Aİ-dən "Rosatom”la yeni tranzaksiyalara qadağa qoyulmasını və Rusiyadan uran, LNG və poladın alınmasına qadağa tətbiq etməsini, Rusiya şirkətlərinə İT xidmətlərinin göstərilməsini məhdudlaşdırmasını, lazer texnologiyalarının Rusiya Federasiyasına ixracını dayandırmasını istəyir.

Həmçinin, Litva hakimiyyəti Rusiya hərbçiləri üçün ixracı qadağan edilməli olan 77 zəruri mal müəyyən edib. Bundan əlavə, Vilnüs qeyd edib ki, Rusiya Aİ şirkətlərinin təqdim etdiyi bulud texnologiyalarından istifadə edir.