Fransa prezidenti erməni diasporu ilə görüşdü

Dekabrın 16-da Fransa prezidenti Fransua Olland Yelisey sarayında Fransada erməni təşkilatları koordinasiya şurasının və erməni diasporunun Fransadakı əsas təmsilçiləri olan Murad Papazyanı, Ara Toranyanı və Aleksis Qovsiyanı qəbul edib. Fransa prezidenti onların erməni mədəniyyətinin Fransada təbliğ etmələri istiqamətindəki fəaliyyətlərini alqışlayıb. Erməni diasporasının təmsilçiləri isə Fransua Ollanda milli yaddaş mərkəzinin layihəsini təqdim edib və Fransa prezidenti bu layihəyə öz dəstəyini ifadə edib. Bundan başqa, onlar ölkə başçısına 2015-ci ildə "erməni soyqırımı"nın yüz illiyinin qeyd edilməsinə hazırlaşdıqları haqda məlumat verib. Görüşdə Fransua Olland Ermənistan prezidenti Serj Sarkisyanın dəvəti ilə 2014-ci ilin may ayında İrəvana səfər edəcəyi haqda məlumatı bir daha təsdiqləyib. Qeyd edək ki, Fransanın erməni diaspor təşkilatları 2015-ci ildə “erməni soyqırımı”nın 100 illiyi münasibətilə Paris yaxınlığında yerləşən Sevr şəhərində Avropada ilk “erməni soyqırımı” abidəsinin və muzey kompleksinin açılışına hazırlaşır. Bu haqda məlumat layihənin təşkilat komitəsi özünün xüsusi olaraq yaradılmış www.sevres2015.org internet səhifəsində yerləşdirib. Layihənin həyata keçirilməsi üçün bütün dünya erməniləri tərəfindən xüsusi fond yaradılıb. Layihəni Fransada bir çox nüfuzlu ermənipərəst ictimai-siyasi xadim və elm adamları dəstəkləyir. Xatırladaq ki, Sevr şəhərinin seçilməsi də təsadüfi deyil. Burada Birinci Dünya müharibəsindən sonra, 10 avqust 1920-ci ildə müttəfiq dövlətlərlə Osmanlı imperatorluğu arasında “Sevr müqaviləsi” imzalanıb. Müqaviləyə əsasən, Osmanlı imperatorluğu faktiki olaraq böyük dövlətlər arasında bölüşdürülmüşdü və onun şərq vilayətlərində Ermənistan dövlətinin yaradılması nəzərdə tutulmuşdu. Lakin həmin ilin avqustun 19-da toplanan Türkiyə Böyük Millət Məclisi Sevr müqaviləsini tanımadığını və Türkiyə torpaqlarının hər qarışı uğrunda savaşacağını bəyan edib. Bu səbəbdən müqavilə kağız üzərində qalıb. “Erməni soyqırımı”nın 100 illiyinə həsr edilmiş “Sevr 2015” adlı bu layihənin həyata keçirilməsi istiqamətində aparılan işlərə 2012-ci ilin sentyabrında start verilib. Hazırda bu təşkilata Fransada yaşayan hüquq elmləri doktoru, akademik Jerar Gergeryan rəhbərlik edir. Layihənin reallaşmasına Patrik Devicyan kimi Fransanın tanınmış şəxsləri də güclü lobbiçilik dəstəyi verərək, 2015-ci ildə Fransa və Ermənistan prezidentlərinin birgə iştirakı ilə xatirə muzeyinin rəsmi açılışına çalışırlar.ANN.Az