"Hansı vaksini vurduranlar COVID-19 daha yüngül keçirir?" - SORĞU

Anews.az vaksin olunduqdan sonra koronavirusa yoluxan insanlar arasında sorğu keçirib. Respondentlərin bir çoxu vaksin olunduqları üçün virusu yüngül keçirdiklərini desələr də, tam tərsini düşünənlər də var.

Sehran Tağızadə: 2021-ci ilin yazında 2 doza "CoronaVac” vaksini vurdurmuşdum. İyulun 8-də qızdırmamın qalxdığını, daha sonra isə dadbilməmin itdiyini hiss etdim. Test elətdirdim, pozitiv çıxdı. Ailə üzvlərimdən uzaq qalmaq üçün xəstəxanada müalicə aldım. Həmçinin, həkimlər də 60 yaşlı, böyrəyində daş olan, özü də təzyiq xəstəsi olan birinin xəstəxanada müalicə almasının vacib olduğunu bildirdi. Sadaladığım xəstəliklərin olmasına baxmayaraq, virusu yüngül keçirdim. Bu səbəbdən də vaksin vurdurmağın tərəfdarıyam, 3-cü doza da "CoronaVac” vaksini  vurduracam. 

Tural Hüseyn:  Avqustun 2-si birinci doza "CoronaVac” vaksini vurdurdum. 9 avqustda zəif öskürək, qızdırma, halsızlıq, boğazağrısı başladı, 38 dərəcə qızdırmam oldu. Həmin gün dərman atdım, qızdırmam düşdü. Növbəti günlərdə bütün simptomlar eyni cür davam etdi. Bildirim ki, test vermişdim, virusa yoluxduğum müəyyən olmuşdu. Artıq 3-cü gün qızdırmam 39.3-ə qədər qalxmışdı. Xəstələnməyimin dördüncü günü səhər qızdırma düşdü. Növbəti 1-2 gün 37-37.7 arası oldu. Sonra qızdırma heç olmadı. Yəni təxminən 4 gün qızdırmam oldu. Mənə elə gəlir ki, vaksin olunduğum üçün nisbətən yüngül keçirdim. Çünki qardaşımın 18 yaşı var, məndən daha sağlamdı, amma peyvənd vurdurmamışdı. Məndə başlayandan 2 gün sonra onda da simptomlar başladı. Və o, məndən qat-qat ağır keçirdi, yataqdan qalxa bilmirdi.

Afaq Aqil:   Koronavirus əleyhinə "Pfizer” vaksini vurdurmuşdum. 25 avqustda özümdə COVID-19-un simptomlarını hiss etməyə başladım. Bir çox çətinliklərlə üzləşsəm də, nəhayət 27 avqustda test verdim. Verdiyim testin cavabı pozitiv çıxdı və cavab 30 avqustda göndərildi. Virusa yoluxduğum  ilk 3 gündə qızdırmam düşmədi, mədə-qarın nahiyəmdə, başımda yüngül ağrılar var idi, amma halsızlıq yaranmadı. Bir çox COVID-19 xəstəsinin əziyyət çəkdiyi nəfəs darlığı da  məndə olmadı. İş yoldaşım vaksin vurdurmamışdı, mənə nisbətən daha ağır keçirirdi. Düşünürəm ki, yüngül keçirdim, buna da səbəb vurdurduğum vaksin idi. Lakin digər vaksinlərin necə təsir etməsi barədə hər hansı məlumatım yoxdur. 

Mükafat İsazadə:   Mən allergiyam olduğu üçün "əks göstəriş setifikatı” almışam. Ona görə də virusu ağır keçirəcəyimi düşünürdüm. Amma çox yüngül keçirdim, heç adi qripi belə asan keçirmirdim.  Yaxınlarım isə  "CoronaVac” vaksini vurdurmuşdu. Buna rəğmən virusa yoluxanda çox ağır keçirdilər. 2-ci dozanı vurdurandan 2 həftə sonra bibim yoluxdu və çox ağır keçirdi, nəfəs aparatına qoşulmalı oldu. Anam da həmçinin çox narahatçılıq keçirdi. 

Əzizə Məmmədova:   45 yaşım var, "Sputnik V” vaksini vurdurmuşdum, amma COVID-19-a yoluxdum və bunu çox ağır keçirdim. Ümumiyyətlə, vaksinə də, peyvəndə də inanmıram. Tutaq ki, vaksin virusla mübarizəni yüngülləşdirir. Bəs niyə mən nəfəs aparatına qoşuldum?! Yox əgər tək təsirli  "pfizer” vaksinidirsə, onda ancaq o vaksin növündən vurulsun. Boş-boş vaksinlərlə başımızı aldatmasınlar.

Elmar Hüseynov:  İyulun 26-da birinci doza  "CoronaVac” vaksini vurdurmuşdum. İyulun 30-da özümdə virusun simptomlarını hiss etməyə başlamışdım. Əvvəlcə qızdırmam var idi, halsızlıq hiss edirdim. Avqustun 3-4-5-də isə iyi  bilməm, dadbilməm itdi. Avqustun 5-də test verdim, nəticə  pozitiv çıxdı. Məndən sonra ailə üzvlərim də virusa yoluxdu. Babam virusdan rəhmətə getdi, hansı ki, hələ vaksinasiya yeni başlayanda  1 doza  "CoronaVac” vaksini olunmuşdu. Sadəcə xəstə olduğu üçün 2-ci doza olunmağa atam icazə verməmişdi. Anam da eyni vaksindən olunmuşdu və xəstəliyi ağır keçirdi. Nəfəs darlığı olmasa belə, ağrıları var idi, yataqdan qalxa bilmirdi. Eyni vaksindən olunan atamda da yüngül ağrılar, öskürək var idi. Qardaşım yaşına görə vaksin olunmasa da çox yüngül keçirdi. Düşünürəm ki, vaksin olunmasaq bəlkə də daha ağır keçirə bilərdik. Yenə də dəqiq məlumat verə bilmərəm. 

Sevinc Məmmədova:  "Pfizer” vaksini vurdurmuşdum. COVID-19-u çox yüngül keçirdim, hətta test verməsəm pozitiv olduğunu bilməzdim. Əsas məsələ odur ki, mənim ciyərimdə narahatlıq var idi, ciddi nəsə olacağından qorxurdum, amma yaxşı keçdi. 

Əli Əliyev: Martda "CoronaVac” vaksini vurdurmuşdum. Apreldə virusa yoluxdum. Yüngül keçirdim. Düşünürəm ki, vaksin olunmaq hazırki dövrdə vacibdir. 


www.anews.az