İlham Əliyev Zelenskini Ukraynanın müstəqilliyinin 35 illiyi münasibətilə təbrik edib

 Azərbaycan Prezidenti İlham Əliyev Ukrayna Prezidenti Volodimir Zelenskini və Ukrayna xalqını ölkənin müstəqilliyinin 35-ci ildönümü münasibətilə təbrik edib.

Azərbaycan Prezidentinin Mətbuat Xidmətinin yaydığı təbrik məktubunda İlham Əliyev Ukrayna-Azərbaycan münasibətlərinin hazırkı səviyyəsindən məmnunluğunu ifadə edib.

“Zəngin ənənələrə malik Azərbaycan-Ukrayna dostluq əlaqələrinin hazırkı səviyyəsi məmnunluq doğurur. Siyasi dialoqumuz, yüksək səviyyəli qarşılıqlı səfərlər, iqtisadi və humanitar sahələrdə əməkdaşlıq strateji tərəfdaşlığımızın mühüm cəhətlərindəndir”, -  məktubda bildirilib.

İlham Əliyev iki ölkə arasında enerji sahəsində uzun illərdir davam edən əməkdaşlığı da xüsusi qeyd edib.

Prezident həmçinin Zelenskinin bu ilin aprelində Azərbaycana işgüzar səfərinin nəticələrini və onunla keçirdiyi görüşü yüksək qiymətləndirib.

“Şübhəsiz ki, müntəzəm görüşlər və təmaslarımız, ölkələrimizin ərazi bütövlüyü və suverenliyi məsələlərində qarşılıqlı dəstəyimiz dövlətlərarası əlaqələrimizin möhkəmlənməsini şərtləndirən əsas amillərdəndir”, - İlham Əliyev bildirib.

Azərbaycan Prezidenti qeyd edib ki, ali səviyyədə fəal dialoq ticari-iqtisadi, humanitar, kənd təsərrüfatı və investisiya sahələri də daxil olmaqla müxtəlif istiqamətlərdə əməkdaşlığın dərinləşdirilməsi üçün əlverişli zəmin yaradır.

İlham Əliyev Azərbaycanın Ukrayna xalqına bundan sonra da humanitar dəstək göstərməyə davam edəcəyini bildirib.

O, məktubunda Azərbaycan-Ukrayna dostluq əlaqələrinin xalqların mənafeləri naminə bundan sonra da gücləndiriləcəyinə əminliyini ifadə edib və Ukrayna xalqına sülh, əmin-amanlıq və rifah arzulayıb