Türkiyə Azərbaycanla birlikdə elektrik enerjisi üzrə TANAP-a bənzər yeni dəhliz yaratmağı planlaşdırır

Türkiyənin energetika və təbii sərvətlər naziri Alparslan Bayraktar bildirib ki, Ankara və Bakı enerji əməkdaşlığını neft və qaz layihələrindən kənara çıxararaq elektrik enerjisi və yaşıl enerji dəhlizləri sahəsində genişləndirir.

Bakıda keçirilən Enerji Həftəsinin açılışında çıxış edən Bayraktar deyib ki, Türkiyə, Azərbaycan, Gürcüstan, Bolqarıstan və Cənub-Şərqi Avropa ölkələri arasında enerji əlaqələrinin gücləndirilməsi istiqamətində iş aparılır.

“Biz TANAP-ın elektrik enerjisi versiyasını yaradacağıq”, - Bayraktar bildirib.

Nazir qeyd edib ki, Bakı-Tbilisi-Ceyhan (BTC), Bakı-Tbilisi-Ərzurum (BTE), TANAP və STAR neft emalı zavodu kimi layihələr regionun enerji xəritəsini dəyişdirərək Avropanın enerji təhlükəsizliyinə mühüm töhfə verib.

Bayraktar bildirib ki, ötən il istifadəyə verilmiş İğdır-Naxçıvan qaz kəməri Naxçıvanın enerji təhlükəsizliyini gücləndirib. O həmçinin Türkiyə və Azərbaycanın birgə təşəbbüsü nəticəsində Suriyaya elektrik və qaz tədarükünün başladığını xatırladıb və bunun ölkənin bərpasına və regional təhlükəsizliyə töhfə verdiyini deyib.

Nazirin sözlərinə görə, Türkmən qazının Azərbaycan və Türkiyə üzərindən ixracı, eləcə də Qazaxıstanın enerji resurslarının BTC vasitəsilə Qərb bazarlarına çatdırılması istiqamətində yeni imkanlar mövcuddur.

Bayraktar vurğulayıb ki, enerji təhlükəsizliyi artıq yalnız resurslara çıxışla məhdudlaşmır və şaxələndirilmiş təchizat, güclü infrastruktur və regional əməkdaşlıq tələb edir.

O bildirib ki, Türkiyədə bərpa olunan enerji mənbələri quraşdırılmış gücün təxminən 65%-ni təşkil edir və ölkə bu göstəriciyə görə Avropada ilk beşlikdə, dünyada isə 11-ci yerdədir.

Nazir əlavə edib ki, Türkiyə bu ilin sonunadək Qara dənizdəki Sakarya yatağından qaz hasilatını illik 7,5 milyard kubmetrə çatdırmağı, həmçinin Akkuyu Atom Elektrik Stansiyasının ilk blokunu istismara verməyi planlaşdırır.

N.Tebrizli