Gəncədə “Gəncə Maarif Evi”nin 6 illiyi münasibətilə “OksiFest” festivalı keçirilib

Gəncədə “Gəncə Maarif Evi” İctimai Birliyinin 6 illik yubileyi münasibətilə “OksiFest” adlı festival təşkil olunub.

Anews.az xəbər verir ki, festival maarifləndirici, mədəni və əyləncəli tədbirlərlə zəngin proqram çərçivəsində keçirilib. Tədbirdə müxtəlif sahələr üzrə interaktiv ustad dərsləri, sərgilər, yaradıcı təqdimatlar və yerli musiqi qruplarının çıxışları təqdim olunub.

Festivalda çıxış edən “Gəncə Maarif Evi”nin sədri bildirib ki, bu cür tədbirlər gənclərin fəallığını artırmaq, onların yaradıcılıq potensialını üzə çıxarmaq və ictimai şəbəkələşməni gücləndirmək məqsədi daşıyır.

Tədbirə tanınmış KVN ustası Bəhram Bağırzadənin iştirakı xüsusi ab-hava qatıb. Festival şəhər sakinlərinin böyük marağı ilə keçdi və bayram əhval-ruhiyyəsi yaradıb.

Qeyd edək ki, “OksiFest” eyni zamanda region gəncləri üçün yeni ideyaların paylaşılması və maarifçilik ruhunun təbliği baxımından mühüm platforma kimi qiymətləndirilir.