XİN Avropa İttifaqının jurnalistlərin həbsi ilə bağlı şərhinə münasibət bildirib

 

Dekabrın 21-də Avropa İttifaqı Azərbaycanı müstəqil jurnalistləri və ictimai fəalları azad etməyə çağırıb.  

"Biz Azərbaycanda jurnalistlərin və siyasi fəalların həbsi ilə bağlı Avropa İttifaqının əsassız ittihamlarını qətiyyətlə rədd edirik. Bu cür əsassız və qərəzli bəyanatları Azərbaycanda məhkəmə hakimiyyətinin müstəqilliyinə müdaxilə cəhdi kimi qiymətləndiririk. Ölkəmizə qarşı bu kimi əsassız bəyanatlarla çıxış etmək əvəzinə, qarşı tərəfi Aİ üzv dövlətlərində insan hüquqlarının pozulması hallarına diqqət yetirməsini tövsiyə edirik. Aİ tərəfi Fransada "sarı gödəkçələr” aksiyasında 12 nəfər üzvün öldürülməsi, Aİ strukturlarında rüşvətxorluq və korrupsiya hallarının yayılması, İslamofobia və müsəlmanlara qarşı hücum faktlarını hələ də araşdırılmayıb və adekvat münasibət bildirməyib.”, - Hacızadə nazirliyin rəsmi saytında bildirib.

 

Dekabrın 1-də Xətai Rayon Məhkəməsi "Abzas Media"nın əməkdaşı Nərgiz Abssalamova ilə bağlı 3 aylıq həbs qərarı verib. Jurnalistə qarşı 206.3.2-ci (qaçaqmalçılıq, qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb.
 
Noyabrın 27-də "Kanal 13"-ün rəhbəri Əziz Orucova qarşı  Cinayət Cinayət Məcəlləsinin 188.2 (Mülkiyyət, istifadə və ya icarə hüququ olmadan torpaq sahəsi üzərində özbaşına tikinti və ya quraşdırma işləri aparma) maddəsilə cinayət işi qaldırılıb. 

Bundan əvvəl, "Abzas Media"nın  direktoru Ülvi Həsənli, direktor müavini Məhəmməd Kekalov və baş redaktoru Sevinc Vaqifqızına qarşı Cinayət Məcəlləsinin 206.3.2-ci (qaçaqmalçılıq, qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb.
 
Hər 4 jurnalist barəsində ilkin olaraq 4 ay müddətinə həbs qəti imkanı tədbiri seçilib. 

 

Gülnar Nazimqızı