Moldovanın daxili işlər naziri Azərbaycana gəlir- Gözləntilər

Moldovanın daxili işlər naziri Adrian Efrosun başçılıq etdiyi nümayəndə heyəti yanvarın 29-dan 31-dək Azərbaycana səfərə gələcək. Bu barədə Report məlumat yayıb.

Siyasi şərhçi Tural İsmayılov bildirir ki, Moldova daxili işlər nazirinin səfəri təkcə diplomatik məsələlər deyil, eyni zamanda iqtisadi məsələlər və əməkdaşlıq perspektivləri müzakirə oluna bilər.

 

"Azərbaycan və Moldova arasında çox yaxşı əməkdaşlıq perspektivləri mövcuddur. Azərbaycan və Moldova Gürcüstan, Ukraynanın üzv olduğu regional təşkilatda (GUAM) təşkilatında təmsil olunurlar. Azərbaycan torpaqlarının 30 il işğalında Moldova, Azərbaycan və Ermənistan arasında get-gəl etməyib. Konkret olaraq, həmişə beynəlxalq platformalarda Azərbaycanın ərazi bütövlüyünün pozulmasını tənqid edib və Azərbaycanın diplomatik mənada beynəlxalq platformalarda bu məsələlərdə yanında yer alıb. Digər tərəfdən bu gün Azərbaycan geopolitik baxımdan çox vacib mövqeylərə malikdir. Ölkəmizin Cənubi Qafqazın əsas güc faktoru olmağı, eyni zamanda Avropa və Asiya arasında vacib mərkəzdə yerləşməyi Moldova üçün əlavə imkanlar yaradır. Hazırda Moldova da Azərbaycan kimi ərazi problemindən əziyyət çəkir.  İmkan verilmir ki, ərazi bütövlüyü tam olaraq təmin edilsin. Moldova Azərbaycan münasibətləri inkişafı baxımından, Azərbaycan iqtisadi baxımından lazımi ölkədir. Moldova Avropada iqtisadi göstəriciləri ən aşağı ölkələrdən biri hesab edilir və bu baxımdan hesab edirəm ki, Moldova darici işlər nazirinin diplomatik səfəri təkcə diplomatik məsələlər deyil, həm də iqtisadi məsələlərdə müəyyən razılaşmalar əldə oluna bilər",- siyasi şərhçi əlavə edib.

 

Moldova və Azərbaycan arasında diplomatik əlaqələr 1992-ci ilin mayın 18-də qurulub.

 

Azərbaycan Respublikasının Milli Məclisində Azərbaycan-Moldova parlamentlərarası əlaqələr üzrə işçi qrupu fəaliyyət göstərir. İşçi qrupu 7 mart 1997-ci il tarixində yaradılıb və ilk rəhbəri Eldar İbrahimov olub. 2016-cı il 4 mart tarixindən Sabir Hacıyev işçi qrupunun rəhbəridir.