Azərbaycan Slovakiyaya qaz ixracını genişləndirməyə hazırdır – Əliyev

Azərbaycan ilə Slovakiya arasında enerji əməkdaşlığı üzrə konkret layihələr icra olunur və Bakı Bratislavaya qaz tədarükünü artırmağa qadirdir. Bunu  Prezident İlham Əliyev bildirib. 

“Keçən il ilk dəfə Azərbaycan qazı Slovakiyaya təchiz edilib”, — Əliyev Slovakiya Prezidenti Peter Pelleqrini ilə birgə bəyanatında deyib.

Azərbaycan hazırda 25 milyard kubmetr qaz ixrac edir, bunun təxminən yarısı Avropa İttifaqına yönəlir. Ölkənin qaz alıcılarının sayı 14-dür və Bakı boru kəmərləri ilə təbii qaz tədarük edən dövlətlər arasında birinci sırada yer alır.

Dövlət başçısı əlavə edib ki, yeni qaz yataqlarının işlənməsi ilə ixrac həcmi artacaq: “Həm Slovakiyaya, həm də onun qonşu ölkələrinə qaz təchizatını daha böyük həcmdə təmin edə biləcəyik”.