İran TRIPP layihəsinə qarşı çıxıb, təhlükəsizlik risklərindən danışıb

“Tramp marşrutu” (TRIPP) təşəbbüsü mahiyyət etibarilə Zəngəzur dəhlizi layihəsini təkrarlayır və Tehran buna “qəti şəkildə” qarşıdır. IRNAnın verdiyi xəbərə görə, bunu İranın ali dini liderinin müşaviri Əli Əkbər Vəlayəti bildirib. xəbər verir.

Vəlayəti Ermənistanın İrandakı səfiri Qriqor Akopyanla görüşdə deyib ki, İran “dəhliz” ideyasına əvvəldən etiraz edib, çünki regionda sərhədlərin dəyişdirilməsi ehtimalını qəbul etmir və bunu öz təhlükəsizliyi üçün risk sayır.

Onun sözlərinə görə, layihənin reallaşması NATO-nun İrandan şimalda mövcudluğuna yol aça bilər və bu, “İranın şimalı və Rusiyanın cənubu üçün ciddi təhlükə” yaradar.

Vəlayəti həmçinin bildirib ki, ABŞ “həssas regionlara” iqtisadi təşəbbüslər adı altında daxil olma təcrübəsinə malikdir və bu təşəbbüslər sonradan tədricən hərbi və təhlükəsizlik xarakterli iştiraka çevrilə bilir.

Görüşdə səfir Akopyan Azərbaycanla sülh prosesi barədə məlumat verib.

IRNA-nın məlumatına görə, Vəlayəti regionda sabitliyin möhkəmlənməsinə yönələn səyləri müsbət qiymətləndirib.

Regional nəqliyyat-kommunikasiya xətlərinin açılması mövzusuna toxunan Akopyan bildirib ki, TRIPP Ermənistanın mövqeyinə görə ərazi bütövlüyü, suverenlik, yurisdiksiya və qarşılıqlılıq prinsipləri əsasında icra olunmalıdır və bu, regionun iqtisadi inkişafı üçün imkanlar yarada bilər.

Səfir əlavə edib ki, İrəvan Tehranın mövqeyini yüksək qiymətləndirir və bu məsələnin İran üçün siyasi və təhlükəsizlik baxımından həssaslığını nəzərə alır.

N.Təbrizli