Onlar şəhid sayıla bilməz - Deputat Azərbaycan vətəndaşlarına müraciət edib

Vətən müharibəsindən sonra ordu quruculuğunda aparılan dəyişikliklər Azərbaycanın sülh dövrünə keçid siyasətini əks etdirir, lakin xarici münaqişələrə cəlb olunan Azərbaycan vətəndaşları ciddi narahatlıq doğurur. Bunu dekabrın 23-də parlamentin iclasında deputat Zahid Oruc deyib. 

Orucun sözlərinə görə, Rusiya–Ukrayna müharibəsində hər iki tərəfdə döyüşən onlarla azərbaycanlı həlak olub və ya itkin düşüb. O bildirib ki, sosial şəbəkələrdə “müqavilə ilə xidmət”, “iş” və “təlim” adı altında aparılan kampaniyalar vasitəsilə vətəndaşlar muzdlu döyüşlərə cəlb edilir.

Deputat qeyd edib ki, rəsmi statistika olmasa da, hərbi mənbələrin məlumatlarına əsasən yüzlərlə azərbaycanlı xarici səngərlərdə döyüşür. O xatırladıb ki, Azərbaycan dövləti əvvəllər xaricdə silahlı birləşmələrə qoşulmanı terrorçuluq kimi qiymətləndirib və bu fəaliyyətə görə sərt cəzalar tətbiq edib.

Zahid Oruc vurğulayıb ki, Qarabağda hərbi təcrübə qazanmış peşəkar şəxslərin aylıq muzd müqabilində yad müharibələrə göndərilməsi həm milli təhlükəsizlik, həm də ordu nüfuzu üçün risk yaradır.

O bildirib ki, Rusiya–Ukrayna müharibəsində ölən Azərbaycan vətəndaşları “şəhid” hesab edilə bilməz və yalnız Vətənin müdafiəsi uğrunda həyatını itirənlər bu ada layiqdir.

Deputat çağırış edib: “Azərbaycan vətəndaşları Ali Baş Komandanın əmri olmayan müharibələrə qoşulmamalıdır", - bildirib.