Ceyhun Bayramov Nyu-Yorkda Kuba və çexiyalı həmkarları ilə görüşüb

Azərbaycanın xarici işlər naziri Ceyhun Bayramov Nyu-Yorka işgüzar səfəri çərçivəsində kubalı və çexiyalı həmkarları Bruno Rodriqes və Petr Matsinka ilə görüşüb.

Azərbaycan Xarici İşlər Nazirliyinin məlumatına görə, Bayramov və Matsinka Azərbaycan-Çexiya strateji tərəfdaşlığı çərçivəsində siyasi, iqtisadi, enerji və humanitar sahələrdə əməkdaşlığı, həmçinin regional və beynəlxalq məsələləri müzakirə ediblər.

Kubanın xarici işlər naziri ilə keçirilən görüşdə isə tərəflər ikitərəfli münasibətlərdə müsbət dinamikanı nəzərdən keçirib, iqtisadiyyat, investisiya, turizm və səhiyyə sahələrində əməkdaşlığın genişləndirilməsinin vacibliyini vurğulayıblar.

Nazirlər həmçinin BMT, Qoşulmama Hərəkatı və CARICOM daxil olmaqla çoxtərəfli platformalarda əməkdaşlıq perspektivlərini, eləcə də Azərbaycanın Kiçik Ada İnkişaf Etməkdə Olan Dövlətlərə göstərdiyi humanitar və inkişaf yardımını müzakirə ediblər.