Aİ Naxçıvan dəmir yolunun bərpasını ən böyük investisiya layihələrindən biri hesab edir

Avropa İttifaqının (Aİ) Azərbaycanda planlaşdırdığı ən iri investisiya layihələrindən biri Naxçıvan dəmir yolunun yenidən qurulmasına dəstəkdir. Bu barədə  Avropa İttifaqı (Aİ) Nümayəndəliyində Əməkdaşlıq Bölməsinin rəhbəri Viktor Bojkov Aİ–Azərbaycan tərəfdaşlığının 30 illiyi və Gəncədə həyata keçirilən layihələrə dair keçirilən media brifinqində deyib.

Onun sözlərinə görə, bir neçə həftə əvvəl Naxçıvana səfər edən nümayəndə heyəti Culfadan Naxçıvana qədər olan dəmir yolu xəttinə baxış keçirib. Səfər çərçivəsində xəttin vəziyyəti yerində qiymətləndirilib və gələcək investisiya ehtiyaclarının müəyyənləşdirilməsi üçün ekspert araşdırmaları aparılıb.

Bojkov bildirib ki, ekspertlər dəmir yolunun bərpası üçün ən uyğun investisiya modelini və layihənin dəyərini müəyyənləşdirmək üzərində işləyirlər.

“Ekspertlərin hamısı bir məsələdə həmfikir idi – dəmir yolu xətti ümumilikdə yaxşı vəziyyətdə qalıb. Biz relslərə, körpülərə, keçidlərə baxdıq və xətt boyunca müşahidələr apardıq”, –  o qeyd edib.

Onun sözlərinə görə, Naxçıvan dəmir yolunun yenidən qurulması Aİ-nin Azərbaycandakı gələcək investisiya gündəliyində mühüm yer tutur və təqdimatda qeyd olunan layihələr arasında ən yaddaqalan təşəbbüslərdən biri hesab olunur.

Aytac Zeynalova