Hacıyev: uşaqların sosial şəbəkələrdən istifadəsinin tənzimlənməsini nəzərdən keçiririk

Azərbaycan uşaqların və yeniyetmələrin sosial şəbəkələrdən istifadəsinin tənzimlənməsi imkanlarını nəzərdən keçirir və bu sahədə beynəlxalq təcrübəni, o cümlədən Avstraliyanın yanaşmasını öyrənir. Bunu Prezidentin köməkçisi Hikmət Hacıyev bildirib.

Şuşada keçirilən IV Qlobal Media Forumunda çıxış edən Hacıyev deyib ki, hökumətlər uşaqları zərərli məzmundan, kibertəzyiqdən, asılılıq yaradan alqoritmlərdən və psixoloji risklərdən qorumaq üçün tədbirləri gecikdirməməlidirlər.

“Bu, texnologiyanın məhdudlaşdırılması ilə bağlı deyil. Məqsəd uşaqlığın qorunması və rəqəmsal innovasiyaların rəqəmsal məsuliyyətlə paralel inkişaf etməsini təmin etməkdir”, – deyə o bildirib.

Hacıyevin sözlərinə görə, Azərbaycan da bir sıra digər ölkələr kimi Conatan Haydtın The Anxious Generation kitabında irəli sürülən ideyaları öyrənir. O qeyd edib ki, Avstraliya sosial şəbəkələrdən istifadə ilə bağlı qanunvericilik təşəbbüslərini hazırlayarkən həmin kitabdan ilham alıb.

Prezidentin köməkçisi həmçinin süni intellekt sahəsində beynəlxalq etik normaların və tənzimləmə mexanizmlərinin hazırlanmasına çağırıb. O bildirib ki, texnologiyaların inkişaf tempi bu sahədə qaydaların formalaşdırılmasını qabaqlayır.

Hacıyev əlavə edib ki, Azərbaycan vaxtaşırı beynəlxalq dezinformasiya kampaniyalarının hədəfinə çevrilir və CNN telekanalını ölkə ilə bağlı həqiqətə uyğun olmayan məlumatlar yaymaqda, Bakıya cavab vermək imkanı yaratmamaqda ittiham edib.

N.Təbrizli