İlham Əliyev Qırğızıstan, Malayziya və Trinidad və Tobaqo liderlərini təbrik edib

Azərbaycan Prezidenti İlham Əliyev Qırğızıstanın müstəqilliyinin 35-ci ildönümü, Malayziyanın Müstəqillik Günü və Trinidad və Tobaqonun Müstəqillik Günü münasibətilə bu ölkələrin liderlərinə təbrik məktubları göndərib.

İlham Əliyev Qırğızıstan Prezidenti Sadır Japarova ünvanladığı məktubda iki ölkə arasında münasibətlərin son illərdə inkişaf edərək müttəfiqlik səviyyəsinə çatdığını bildirib.

Azərbaycan Prezidenti qeyd edib ki, onun bu yaxınlarda Qırğızıstana etdiyi dövlət səfəri Bakı ilə Bişkek arasında sıx tərəfdaşlıq əzmini və geniş əməkdaşlıq gündəliyini nümayiş etdirib.

İlham Əliyev Qırğızıstanın dövlətçiliyin möhkəmləndirilməsi, sosial-iqtisadi inkişaf və quruculuq sahələrində əldə etdiyi nailiyyətləri də vurğulayıb.

Azərbaycan Prezidenti Malayziya Kralı Sultan İbrahimə göndərdiyi məktubda isə iki ölkə arasında dostluq və qarşılıqlı hörmətə əsaslanan tərəfdaşlıq əlaqələrinin hazırkı səviyyəsinin məmnunluq doğurduğunu bildirib.

O, Azərbaycan-Malayziya münasibətlərinin həm ikitərəfli, həm də beynəlxalq təşkilatlar çərçivəsində bundan sonra da inkişaf edəcəyinə əminliyini ifadə edib.

İlham Əliyev Trinidad və Tobaqo Prezidenti Kristin Karla Kanqaluya məktubunda Azərbaycan ilə Trinidad və Tobaqo arasındakı münasibətlərin dostluq və əməkdaşlıq ruhunda inkişaf edəcəyinə inandığını bildirib.

Hər üç məktubda Azərbaycan Prezidenti qarşı tərəfə möhkəm cansağlığı və fəaliyyətində uğurlar, xalqlara isə əmin-amanlıq və firavanlıq arzulayıb.