Aİ-nin Azərbaycandakı nümayəndəliyi: Minatəmizləmənin məqsədi yalnız əraziləri təmizləmək deyil

Minatəmizləmə fəaliyyətinin əsas məqsədi yalnız əraziləri minalardan təmizləmək deyil, insanların təhlükəsiz şəkildə geri qayıtmasına və icmaların yenidən qurulmasına şərait yaratmaqdır. Bunu Avropa İttifaqının Azərbaycandakı nümayəndəliyinin rəhbəri Mariyana Kuyundziç “Şəhərlərin bərpası üçün humanitar minatəmizləmə: Təhlükəsiz yaşayış məskənləri üçün mükəmməllik standartlarının müəyyənləşdirilməsi” mövzusunda keçirilən 4-cü beynəlxalq konfransda çıxışı zamanı deyib.

O bildirib ki, ölkəsinin təcrübəsindən bilir ki, minatəmizləmə yalnız çirklənmiş ərazilərin minalardan təmizlənməsindən ibarət deyil. Bu fəaliyyət insanların geri qayıtması, evlərin və ictimai infrastrukturun yenidən qurulması, icmaların normal həyata, sabitliyə və ümidə qovuşması üçün zəruri şəraitin yaradılmasını nəzərdə tutur.

“Bizim mesajımız aydın və dəyişməzdir: heç kim üzərində addımladığı torpaqda qorxu içində yaşamamalıdır”, - Mariyana Kuyundziç bildirib.

Onun sözlərinə görə, konfrans çərçivəsində keçirilən müzakirələr minatəmizləmənin şəhərlərin bərpasına daha səmərəli şəkildə necə dəstək verə biləcəyi, standartların necə təkmilləşdirilməsi və tərəfdaşlıqların yerlərdə daha effektiv nəticələrə necə töhfə verə biləcəyi barədə təcrübə mübadiləsi aparmağa imkan verir.

“Son nəticədə məqsəd yalnız əraziləri minalardan təmizləmək deyil. Məqsəd təhlükəsizliyi bərpa etməkdir. Yalnız riskləri aradan qaldırmaq deyil. İnsanların geri qayıtmasına imkan yaratmaqdır. Yalnız əraziləri istifadəyə açmaq deyil. İcmaları yenidən qurmaqdır”, - o vurğulayıb.

Gülnar Nazimqızı