Məhkəməyə əlçatan şəxs üçün qətimkan tədbirinə ehtiyac yoxdur - Arzuxan Əlizadə

Deputat Arzuxan Əlizadə məhkəməyədək icraat zamanı həbs qətimkan tədbirinin əvəzinə alternativ tədbirlərdən daha çox istifadə edilməsinin vacib olduğunu bildirib.

O, Milli Məclisdə çıxışı zamanı istintaq altında olan şəxslərlə bağlı həbsdən başqa qətimkan tədbirlərinin də nəzərdə tutulduğunu xatırladıb.

“Daha çox həbsli qətimkan tədbirinə dair qərar verilir və bu, birmənalı olaraq doğru deyil. Bu istiqamətdə məhkəmələrimizə tövsiyələrin verilməsinə çox ciddi ehtiyac var. Bununla bağlı Azərbaycan Prezidenti də zamanında öz fikrini bildirib”, - Əlizadə deyib.

Deputatın sözlərinə görə, şəxsin istintaq müddətində əlçatan olması və məhkəmədən yayınmaması halında onun barəsində həbs qətimkan tədbirinin seçilməsinə ehtiyac olmaya bilər.

“Əgər şəxsin məhkəməyə əlçatanlığı varsa, məhkəmədən qaçıb gizlənmirsə, istintaq müddətində əlçatandırsa, onun barəsində qətimkan tədbiri seçilməsinə də ehtiyac yoxdur. Məhkəmədə əgər cinayəti sübut olunacaqsa, təbii ki, həbs ediləcək”, - deputat bildirib.

Əlizadə həmçinin həbs qətimkan tədbirlərinin çox tətbiq edilməsinin Azərbaycanın beynəlxalq hesabatlarda mənfi şəkildə təqdim olunmasına səbəb olduğunu qeyd edib.

O, Cinayət Məcəlləsində nəzərdə tutulan alternativ qətimkan tədbirlərindən daha geniş istifadə edilməsini təklif edib.

Gülnar Nazimqızı