Azərbaycan və Mərkəzi Afrika Respublikası arasında diplomatik əlaqələr qurulub

Azərbaycanın xarici işlər naziri Ceyhun Bayramov Mərkəzi Afrika Respublikasının xarici işlər, Frankofoniya və Xaricdəki Mərkəzi Afrikalılar naziri Silvi Baipo-Temon ilə görüşüb.Bu barədə Azərbaycan Xarici İşlər Nazirliyi "X" hesabında məlumat yayıb.

Görüşdə Azərbaycan-Mərkəzi Afrika Respublikası münasibətlərinin inkişaf perspektivləri, həmçinin siyasi, iqtisadi, mədəni, təhsil və elmi sahələrdə əməkdaşlığın genişləndirilməsi məsələləri müzakirə olunub.

Nazirlər BMT, Afrika İttifaqı və digər çoxtərəfli platformalar çərçivəsində əməkdaşlıq məsələlərini də nəzərdən keçiriblər.

Tərəflər Mərkəzi Afrika Respublikasından olan tələbələrin İslam Əməkdaşlıq Təşkilatına və Qoşulmama Hərəkatına üzv dövlətlərin vətəndaşları üçün Azərbaycanın yaratdığı təhsil təqaüd proqramlarından yararlanmasını da qeyd ediblər.

Görüş çərçivəsində Azərbaycan ilə Mərkəzi Afrika Respublikası arasında diplomatik münasibətlərin qurulması haqqında Birgə Kommunike imzalanıb.