Aİ-nin XİN başçılarının toplantısında Azərbaycan-Ermənistan münasibətləri müzakirə olunacaq

Bazar ertəsi Lüksemburqda toplanacaq Avropa İttifaqı (Aİ) Xarici İşlər Şurasının toplantısında Azərbaycan-Ermənistan münasibətləri müzakirə olunacaq.

Bu barədə xarici mətbuat xəbər verir.

Məlumata görə, Avropa İttifaqının xarici işlər və təhlükəsizlik siyasəti üzrə ali nümayəndəsi Josep Borrel Aİ Şurasının prezidenti Şarl Mişelin Azərbaycan və Ermənistan arasında münasibətlərin normallaşması istiqamətində fəaliyyəti barədə nazirlərə məlumat verəcək. Avropa Şurasının rəhbəri iyulun 21-də Brüsseldə bu ölkələrin liderləri ilə növbəti üçtərəfli görüşü keçirəcək.

Avropalı nazirlərin müzakirəsi xüsusilə Avropa İttifaqının Ukraynaya hərbi yardımına həsr olunacaq. Nazirlərin həmçinin "Prezident Zelenskinin sülh formulu”na diqqət yetirmələri gözlənilir.

"Aİ Ukraynanı qətiyyətlə və tam dəstəkləyir və lazım olduğu müddətcə Ukraynaya və onun xalqına güclü siyasi, iqtisadi, hərbi, maliyyə və humanitar yardım göstərməyə davam edəcək", - Aİ Şurası bildirib.