Barokko üslubundakı geniş kolleksiyalı kitabxana – REPORTAJ

Bu gün biz sizinlə dünyanın ən qədim kitabxanalarından birinə, Vyanada Hofburq sarayında yerləşən Avstriyanın nəhəng kitab məbədinə baş çəkəcəyik. Qədim əlyazmaların və qiymətli işlərin saxlanıldığı Keçmiş Habsburqlar İmperiya Kitabxanası, indiki Avstriya Milli Kitabxanasında 2 milyon kitab və 8000 inkunabul (1500-ci ilə qədər çıxan kitablar) saxlanılır. Bu xəzinələrin arasında Cəsur Karlın dua kitabı və Qutenberqin 1465-ci ildə nəşr etdiyi "İncil” də var. Kitabxananın kolleksiyasına həmçinin 180 min papirus da daxildir, onlardan ən qədimi e.ə XV əsrə daxildir. Bundan başqa, burada qədim və nadir kitablar (Məsələn, 16-cı əsrə məxsus Vyana Genezisi), xəritələr, qlobuslar, şəkillər, fotolar, avtoqraflar, plakatlar, məşhur bəstəkarların partituraları var. 

 

Biraz tarix barədə. Kitabxananın əsası hələ XV əsrdə qoyulub, ancaq indiki quruluşuna o, 1723-cü ildə düşüb. İlk kolleksiyada İmperiyanın topladığı 200 min kitab, Şahzadə Yevgeni Savoyskinin 15 min kitabı, II İosifin monastrlardan konfiskasiya etdiyi kitablar olub. 

Hazırda Habsburqlar kitabxanası həm kitab məbədi, həm də muzeydir. 

 

Binada ilk gözə dəyən ikinci mərtəbəyə qalxan pilləkəndir, oradan kitabxanaya gözəl mənzərə açılır. Kitabxanaya girən kimi xəbərdarlıq edilir ki, ziyarətçilər eksponatlara toxunmasınlar, şəkil də ancaq işıqsız çəkmək olar. 

Kitabxanaya daxil olan kimi onun dizaynı və daxili interyeri adamı heyran edir. Parad zalı sadəcə möhtəşəmdir. Burada əlavə şərhə ehtiyac yoxdur. 

Fon Erlaxın bütöv bir memar ordusunun üzərində çalışdığı kitabxana barokko üslubundadır. Bu faktor Avstriya kitabxanasına möhtəşəmlik və əzəmət bəxş edir. 

 

İçəridə olanda sənə elə gəlir ki, sən kitabxanada deyil, kilsədə, ya da imperiya sarayındasan. Günbəzin daxili hissəsi, zərif fresakalar Daniel Qranın əlindən çıxıb. 

 

Binanın günbəzində xüsusi deşik açılıb, buradan daxil olan günəş şüası xüsusi effekt yaradır və binanın içinin süni işıqlandırılmasına ehtiyac qalmır. 

Kitabxanada həmçinin qlobus kolleksiyası da saxlanılır. 

Böyük zalın iri pəncələrlə qurulmasıyla ciddi bir məqsəd güdülüb, bura təkcə saxlanc yeri yox, həm də aristokratiyanın mütaliə etdiyi yer idi. Kitablar ölçülərinə əsasən yığılırdı. Bundan başqa, kitabxanada çox sayda gizli otaqlar var. 

 

Zalın hər addımlığında Avstriyanın məşhur şəxslərinin şərəfinə qoyulan çox sayda heyəlciklə rastlaşmaq mümkündür.  

Bir sözlə, əgər Avstriyaya gəlsəniz, bu ölkənin daha bir möhtəşəmliyini və əzəmətini hiss etmək üçün mütləq Milli Kitabxanaya baş çəkin, burada bəşəriyyətin mənəvi və əqli xəzinəsi qorunur. 

Xoş seyrlər: