Nəşr edilən kitabların satışı online satışdan çoxdur - Açıqlama

Baş nazir Əli Əsədov dövrün tələblərinin dəyişdiyini, gənclərin kitabxana və kitablardan çox internet resurslarına üz tutduğunu söyləyib.
 
Bəs gənclərin kitablara marağının azalmasının səbəbi nədir?
 
Deputat Ceyhun Məmmədov hesab edir ki, bölgələrdə kitabxanaların fəaliyyətini gücləndirmək lazımdır.
 
"Sovet dövründə hətta ən kiçik kənddə belə kitabxana var idi. İnsanlar gedib o kitabxanalardan istifadə edirdilər. Bu mənada birinci kitabxana əlçatan olmalıdır. Hər bir gənc istənilən kitabı, istənilən kitabxanadan pulsuz götürüb oxuya bilməlidir. Bu gün heç də bütün gənclərin imkanı yoxdur ki, 10 manat verib hansısa nəşriyyatın kitabını alsın. Ona görə, kitabxanalar olmalı və bu kitabxanalar kitablarla təmin edilməlidir”, - o qeyd edib.
 
Deputatın sözlərinə görə, gəncləri kitaba cəlb etmək üçün davamlı maarifləndirmə tədbirləri aparılmalıdır.
 
"Heç bir gənc gedib birdən-birə kitab oxumayacaq. Onun üçün kitabın təbliğatı aparılmalıdır. Kitabı mədəniyyəti gənclərə aşılanmalıdır.  Nə qədər ki, bizim televiziya kitabları yox, şou proqramları təbliğ edir, gənclər də nə görürsə, onu götürür”, - Məmmədov bildirib.
 
Təhsil eksperti Elçin Əfəndi qeyd edir ki, tələbələrin internet resurslarına üz tutmasının səbəbi Azərbaycan dilində ədəbiyyatın çətin  tapılması ilə əlaqədardır.
 
"İndi tələbələrin böyük əksəriyyəti internet resursları üzərindən araşdırma aparırlar. Kitabxanalardan istifadə əvvəlki dövrlərlə müqayisədə çox azdır. Bunun da bir neçə səbəbi var. Hazırda biz informasiya texnologiyalarının inkişaf etdiyi bir əsrdə yaşayırıq və günü gündən də bu inkişaf edir.  Elektron resurslar kifayət qədər çoxdur. Təəssüf ki, bəzi hallarda tələbələrin internet resurslarından istifadə etməsinin səbəbi məhz öz dilimizdə olan vəsaitlərin, ədəbiyyatın tapılması çətinliyi ilə əlaqədardır. Tələbələr bu baxımdan məcburdurlar ki, ingilis, rus dillərində müvafiq ixtisaslarla bağlı internet üzərindən ədəbiyyatlar əldə etsinlər.  Elm və Təhsil Nazirliyinin tabeliyində olan qurum və agentliklər daha diqqətli olmalıdırlar. Onlar çalışmalıdır ki, bəzi vəsaitlər öz doğma dilimizdə tərcümə olunsun və yaxud öz doğma dilimizdə müəlliflər yeni vəsaitləri nəşr etdirsinlər. Belə olan halda kitabxanalara, kitablara maraq arta bilər. Nəticədə də internet resursundan yox kağız daşıyıcılardan istifadə edə bilərlər”. , Əfəndi bildirib.
 
"Qanun” Nəşrlər evinin rəhbəri Şahbaz Xuduoğlu hesab edir ki,  kitabın mövqeyi Azərbaycanda güclənsə də, əhali sayına nisbətdə zəifdir.
 
 
 
 
 
 
 
 
 

www.anews.az