AzərbaycanDizayn Biennalesi-2025-də təmsil olunub

London Dizayn Biennalesi-2025 çərçivəsində Azərbaycan pavilyonunun rəsmi açılışı baş tutub. Ölkə bu nüfuzlu beynəlxalq incəsənət tədbirində ilk dəfə təmsil olunur.

Heydər Əliyev Mərkəzi və IDEA İctimai Birliyinin təqdim etdiyi MAMA “Ana təbiət” sərgisi çərçivəsində Azərbaycan pavilyonunda təbiət incəsənətin, yaddaşın və gələcəyin mənbəyi kimi təqdim edilir. Layihə insanın təbiətlə dərin bağlarını müasir incəsənət və ekoloji yanaşma vasitəsilə tədqiq edir.

Açılış mərasimində çıxış edən Heydər Əliyev Fondunun vitse-prezidenti, IDEA-nın təsisçisi Leyla Əliyeva iqlim dəyişikliyinin doğurduğu problemlərə toxunaraq, təbiətlə yenidən bağ qurmağın və incəsənətin bu prosesdəki rolunun əhəmiyyətini vurğulayıb.

 “Təbiət bizim evimizdir. İncəsənət, gözəllik və qadın duyumu ilə onun ritmini yenidən hiss edə bilərik”,  - o bildirib.

Layihə daha əvvəl Bakı, Bəhreyn və Romada uğurla təqdim olunub. 

Biennalenin direktoru Viktoriya Broaks Azərbaycan pavilyonunun şeiriliyi və ekoloji mesaja verdiyi bədii cavabı yüksək qiymətləndirib. Böyük Britaniyanın Azərbaycan və Mərkəzi Asiya üzrə ticarət elçisi, lord Con Alderdays isə mədəni mübadilə və ekoloji dialoqun dayanıqlı gələcək üçün vacibliyini qeyd edib.

Tədbir Londonun tarixi Somerset House binasında keçirilib və Azərbaycan pavilyonu iyunun 29-dək ziyarətçilər üçün açıq olacaq.