Vaqif Mustafazadənin 75 illik yubileyi qeyd olundu

 

"Report" xəbər verir ki, yubiley gecəsinə təşrif buyuran qonaqlar əvvəlcə foyedə yaradılan Vaqif Mustafazadə guşəsi ilə tanış oldular. Bənzərsiz caz ustasının həyat hekayəsini anlatan foto-stend qonaqlara təqdim edildi.

Yubiley mərasimi cazmenin ömür yolundan bəhs edən videoçarxın nümayişi ilə başladı. Vaqif Mustafazadə caz-muğam üslubunun banisi idi. Məhz bu səbədən də, yubiley gecəsi muğam ifası ilə başlandı.

Yubiley gecəsinin iştirakçılarına əsl caz ziyafəti verildi. İlk çıxış SSRİ xalq artisti Fərhad Bədəlbəylinin ifasında oldu. Xalq artisti Ənvər Sadıqovun ifasında maraqlı kompozisiya tamaşaçılara təqdim edildi. "Qaya" vokal qrupu və "Rast" qrupunun çıxışı xüsusilə seçildi.

Gecədə İsfar Sarabski, Dövlət Mahnı Teatrının yeni yaradılan simfonik orkestri bədii rəhbər Salman Qəmbərovun iştirakı ilə maraqlı caz nümunələri təqdim etdi. Tədbir Vaqif Mustafazadənin səs yazısı, və görüntüləri ilə davam etdi.

Yubiley gecəsində hər kəsin gözü Vaqif Mustafazadənin qızı, dünya şöhrətli Əzizə Mustafazadəni axtarsa da, Əzizə atasının 75 illik yubileyində iştirak etmədi.

Qeyd edək ki, V.Mustafazadə 1940-cı il martın 16-da İçərişəhərdə dünyaya gəlib.Anası Zivər xanım dahi Üzeyir bəyin tələbəsi olub. Atasının ölümündən sonra, anası Vaqifin tərbiyəsi ilə məşğul olub. Onu əsl musiqiçi kimi anası Zivər xanım yetişdirib.

1963-cü ildə V.Mustafazadə Asəf Zeynallı adıma Bakı Musiqi Kollecini bitirib.Konservatoriyanı bitirdikdən sonra 1964-cü ildə "Orero" ansamblına yaradır. "Qafqaz" caz üçlüyünə, "Leyli" və "Sevil" qadın vokal instrumental və "Muğam" instrumental ansambllarına rəhbərlik edir. Beynəlxalq caz müsabiqələri və festivallarının ("Tallin-66", "Tbilisi-78", Monte-Karlo) laureatı olub.

1979-cu ildə -cu ildə Monako caz Festivalında qalib gələn Vaqif Mustafazadə vətənə "Ağ royal" mükafatı ilə qayıdır və növbəti konsertlərinə hazırlaşır.

Vaqif Mustafazadə Azərbaycan caz musiqisinin banisi və yeni caz fikrinin təsisçisidir. O,Azərbaycanmusiqisinin, muğamın klassik Amerikan caz musiqisi ilə sintezini yaradıb. Vaqifin yeni devizi Caz-Muğam adlanır. V.Mustafazdə Azərbaycan Muğam Caz Hərəkatının memarıdır.

Vaqif Mustafazdə 1979-cu il dekabrın 16-da Daşkənddə qastrolda olarkən ürək tutmasından vəfat edib.