Şahbaz Xuduoğlu dükan açdı – FOTO

 

Bu haqda Axar.az-a "Qanun" nəşrlər evinin rəhbəri Şahbaz Xuduoğlu məlumat verib.

 

"Qanun pərakəndə və topdansatış mağazası” adlanan dükana artıq bu gündən etibarən kitablar yerləşdirilməyə başlanılıb.

 

Ş. Xuduoğlu dükan barədə bunları deyib:

 

"Adi dükanlarda necədirsə, bizdə də elə, heç bir güzəşt yoxdur. Nəticənin necə olacağını indidən deyə bilmərəm, sadəcə, təcrübəm göstərir ki, biz kitabı bütün sosial qruplara əlçatan etməsək, könüllü qaydada kimsə kitabı axtarmayacaq. Keçən il küçələrdə yarmarka etdik. Bu il qoymadılar, tərcüməçilər, işçilər qarşısında çıxılmaz duruma düşdük. Bütün mümkün variantları sınaqdan keçirirəm. Dükan üçün aylıq, təkcə kirayə haqqı 1800 AZN ödəyəcəyik. Bütün kitablara 30% endirim edəcəyik. Uşaq kitablarına da 30%-ə qədər endirim olacaq. Psixologiya, uşaq kitabları, romanlar, hamısı satışda olacaq. Onsuz da bizim cəmiyyətdə kitab oxuyan təbəqənin maliyyə vəziyyəti ağırdır. Bura gələn insanlar da düşüncəmə görə, həmin insanlardır, rayonlardan gələnlər çoxdur. Onlar da kitablar əldə edə biləcəklər. Mən istərdim evinə əşya, mebel, yastıq, dəsmal, qab-qaşıq almağa gələnlər kitab da alsınlar. Kitab insanlara daim xatırladılmalıdır, əks halda tez unudulur”.

 

Qeyd edək ki, "Qanun" nəşrlər evinin sözügedən ilk kitab dükanı Sədərək Ticarət Mərkəzinin "Şirniyyat” bölməsinin 9-cu sırasında, 58-ci dükanda yerləşir.