Azərbaycan “France 2” telekanalına qarşı iddia qaldırır

Azərbaycan tərəfi sentyabrın 7-də Fransanın "France 2” telekanalında yayımlanan və ölkəmizə qarşı böhtan xarakteri daşıyan "Cash Investigation" verilişinin nümayişindən sonra bu telekanala qarşı iddiqa qaldırmaq niyyətindədir. Trend-in məlumatına görə, bu barədə vəkil Olivye Pardo xəbər verib. Məlumatı "France-Presse” agentliyi yayıb.

Azərbaycan rəhbərliyi adından çıxış edən fransız vəkil Olivye Pardo bəyan edib ki, jurnalistlər Eliz Lyuse və Loran Rişar proqram ərzində Azərbaycanın ünvanına əsassız, sübutlara söykənməyən mövqedən çıxış ediblər.

Qeyd edək ki, sentyabrın 7-də "France 2” telekanalında "Cash Investigation” həftəlik araşdırma proqramı çərçivəsində Azərbaycanla bağlı sujet yayımlanmış və bu proqram ərzində Azərbaycana qarşı qərəzli mövqe nümayiş etdirilərək birtərəfli, böhtan xarakterli məlumatlar səsləndirilmişdir.

Vəkil qeyd edib ki, Azərbaycan bu hadisəyə dözmək niyyətində deyil və ona şər atanları məhkəməyə verəcək.