Spiker: “Qarabağ probleminin sülh yolu ilə həlli üçün hələ imkanlar qalmaqdadır”

Milli məclisin mətbuat xidmətindən APA-ya verilən məlumata görə, O. Əsədov Azərbaycanın Malta ilə əlaqələrin inkişafında maraqlı olduğunu, Malta ilə siyasi əlaqələrin yüksək səviyyədə olmasının digər sahələrdə münasibətlərin inkişafı üçün yaxşı şərait yaratdığını bildirib.

 

Milli Məclis sədri bu günədək ölkələrimiz arasında iki sənəd imzalandığını xatırladıb və münasibətlərin hüquqi bazasını daha da möhkəmləndirməyin günün tələbi olduğunu qeyd edib. O. Əsədov ölkələrimiz arasında iqtisadi əməkdaşlığın dərinləşməsi üçün geniş imkanların olduğunu, Azərbaycanın Maltanın enerji sektoruna investisiya yatırımında  iştirak etdiyini nəzərə çatdırıb. 

 

O. Əsədov BMT Təhlükəsizlik Şurasının, AŞPA-nın qərar və qətnamələrinə məhəl qoymayan Ermənistanın işğalçılıq siyasəti yeritməkdə davam etdiyini də bildirib. Onun sözlərinə görə, cəbhəyanı bölgələrdə erməni silahlıları tərəfindən dinc əhali, yaşayış və ictimai  binalar atəşə məruz qalır: "Bu ilin aprel ayının əvvəlində cəbhə xəttində baş vermiş hadisələr bir daha sübut etdi ki, Azərbaycan problemi başqa vasitələrlə də həll edə bilər. Ancaq biz hesab edirik ki, münaqişənin ölkələrin ərazi bütövlüyü prinsipi, beynəlxalq hüquq normaları çərçivəsində, sülh yolu ilə həlli üçün hələ imkanlar qalmaqdadır. Bunun üçün nüfuzlu beynəlxalq qurumların və ayrı-ayrı dövlətlərin  səylərinin artırılmasına ehtiyac var”.

 

Malta xarici işlər naziri C. Vella isə Maltanın bir Avropa ölkəsi kimi Azərbaycanla əlaqələri inkişaf etdirmək niyyətində olduğunu söyləyib. Dağlıq Qarabağ münaqişəsinə toxunan nazir problemin beynəlxalq hüquq normaları çərçivəsində ədalətli həllinin tərəfdarı olduğunu vurğulayıb, atəşkəs rejiminə əməl olunmasını önəmli hesab edib. O, ATƏT-in Minsk qrupunun bu sahədə gördüyü işlərdən danışaraq, problemin həlli üçün danışıqlar prosesinin davam etdirilməsini çıxış yolu kimi dəyərləndirib.

 

Milli Məclis Aparatının rəhbəri Səfa Mirzəyev, ölkəmizin Maltadakı səfiri Məmməd Əhmədzadə və digər rəsmi şəxslərin iştirak etdiyi görüşdə parlamentlərarası əlaqələrin inkişaf perspektivləri, regional münaqişələrin həlli yolları və həyatın digər sahələrində əməkdaşlığın dərinləşdirilməsi ilə bağlı fikir mübadiləsi aparılıb.