"Türkiyə səfiri yenidən Berlinə qayıdacaq" - POLİTOLOQ

 

Qətnamə sənədində deyilir:  "Birinci Dünya Müharibəsində Osmanlı imperiyasında ermənilərin məhv edilməsi erməni xalqının minillik tarixində böyük nəticələrə səbəb olmuş bir fəlakət idi. Ona görə ki, müstəqil hesablamalara görə, deportasiya və kütləvi qətllər bir milyondan çox erməninin həyatı bahasına başa gəlib. Çoxsaylı müstəqil tarixçilər, parlament və beynəlxalq təşkilatlar ermənilərin təqibi və məhv edilməsini soyqırım hesab edirlər”. 

ANN.Az xəbər verir ki, Bundestaqın deputatlarının qəbul etdiyi qətnaməni "Atlas" Araşdırmalar Mərkəzinin rəhbəri, politoloq Elxan Şahinoğlu şərh edib.

 

"Ankara Almaniyadakı səfirini geri çağırıb, ancaq ara sakitləşəndən sonra səfir yenidən Berlinə qayıdacaq" 

 

Politoluqun sözlərinə görə, Almaniya parlamentinin "erməni soyqırımı” qətnaməsini qəbul etməsinə baxmayaraq, Ankara Berlinlə münasibətləri tamamən dondurmayacaq: "Doğrudur, Ankara Almaniyadakı səfirini geri çağırıb, ancaq ara sakitləşəndən sonra səfir yenidən Berlinə qayıdacaq. Vaxtilə Fransa parlamenti də oxşar "qətnamə” qəbul etmişdi. Ankara Fransadakı səfirini geri çağırdı, az sonra səfir yenidən Parisə qayıtdı. Çünki, Ankara ermənpərəst qətnamələrə nə qədər qəzəblənsə, bunun ədalətsiz olduğunu vurğulasa da, bu "sənədləri” qəbul edən ölkələrlə əməkdaşlığı tamamən dayandıra bilməz. Ortada milyardlarla dolar iqtisadi-ticarət əlaqələri, biznes maraqları var. Elə Ermənistanla erməni lobbisinə də bu lazımdır ki, Türkiyənin "erməni soyqrımını” qəbul edən ölkələrlə münasibətləri tamamən pozulsun".

Elxan Şahinoğlu "erməni soyqırımı” qətnamələrinin qəbuluna laqeyd baxılmasını düzgün saymır: "Sadəcə, bunu faciəyə də çevirmək lazım deyil, qəbul edəcəkləri qondarma qətnamələrin Türkiyə əleyhinə hüququ gücü yoxdur. Əks həmlələri gücləndirmək lazımdır. Azərbaycan dünya miqyasında Xocalı soyqrımının tanıtdırılmasına çalışır və müəyyən nəticələr də var, bir sıra parlamentlər müvafiq sənədlər qəbul ediblər. Türkiyə Azərbaycanla birgə bu iqtiqamətdə çalışmaları yoğunlaşdırmalıdır ki, dünya görsün ki, "erməni soyqırımı” iddiaları mübahisəli olduğu halda, Xocalı soyqırımı şahid ifadələri və video görüntürlərlə sübut olunub, ermənilər bu sübutlara etiraz etmirlər".

 

Qeyd edək ki, Türkiyə Bundestaqın deputatlarının qəbul etdiyi qətnamə ilə əlaqədar Almaniyadakı səfiri Hüseyn Avni Karslıoğlunu geri çağırıb.