Milli Qəhrəman Çingiz Qurbanovun Qusarda barelyefi açıldı

Barelyef onun adını daşıyan küçədə qoyulub

Meyiti 39 gün qarşı tərəfdə olan və girov götürülərkən xüsusi şücaət göstərmiş Çingiz Qurbanovun doğulduğu Qusar rayonunda xatirə barelyefinin açılışı olub.

İstiPress-in şimal bürosunun məlumatına görə, barelyef onun adını daşıyan küçədə qoyulub. Rayon icra hakimiyyətinin dəstəyi ilə inşa edilən mərmərdən olan barelyefin hər iki tərəfinə Azərbaycanın Milli Ordusu və hərb siyasəti ilə bağlı Heydər Əliyevin və İlham Əliyevin sözləri həkk edilib. Açılış mərasimində rayon rəsmiləri, ictimaiyyət nümayəndələri, Milli Qəhrəmanın valideynləri, sakinlər iştirak edib. Qusarın icra başçısı Şair Alxasov Çingizin adının nəinki Qusarın, bütün Azərbaycanın hərb tarixinə xüsusi     olaraq yazıldığını deyib. Bildirib ki, Çingiz Qurbanovun şücaəti və əzmi bütün gənclərimizə gözəl nümunədir. Qusardan seçilən millət vəkili Azər Badamov da çıxışında igid hərbçinin Azərbaycana baş ucalığı gətirən qəhrəmanlığı ilə hər bir qusarlının öyündüyünü bildirib. Ləzgi xalqının nümayəndəsi olan Çingiz Qurbanovun atası Salman Qurbanov oğlunun adına qoyulan hörmət və qayğıya, diqqətə görə prezident İlham Əliyevə, onun Qusardakı nümayəndəsi Şair Alxasova, digər məsul qurum təmsilçilərinə minnətdarlıq edib.

Xatırladaq ki, meyiti Azərbaycan tərəfinin apardığı danışıqlardan sonra geri alınan və fevralın 6-da Qusar şəhidlər xiyabanında dəfn olunan, 23 yaşlı Çingiz Qurbanovun igidliyi ölkə rəhbərliyi tərəfindən xüsusi qiymətləndirilib.

Prezident İlham Əliyevin fərmanı ilə Azərbaycanın Milli Qəhrəmanı adına layiq görülən Çingiz doğma rayonu Qusarda da xüsusi hörmət və diqqətlə anılmaqdadır. Qusarın icra başçısı Şair Alxasov şəhərin mərkəzi küçələrindən birinə Çingiz Qurbanovun adının verilməsi barədə sərəncam imzalayıb. Ailəsi Qusar şəhərində torpaq sahəsi, prezidentin tapşırığı ilə Bakının Xətai rayonunda isə mənzillə təmin edilib. Milli Qəhrəmanın oxuduğu Həzrə kənd məktəbinə də igid hərbçinin adı verilib.

Məlumat üçün deyək ki, Çingiz Qurbanovun qardaşına isə DTX-də iş verilib.
www.anews.az