TANAP və Naxçıvan əməliyyatları: Rusiya niyə susdu?

Teleqraf.com-a açıqlamasında politoloq Eldar Namazov belə deyib.

Politoloq vurğulayıb ki, Kollektiv Təhlükəsizlik Müqaviləsi Təşkilatı (KTMT) və Avrasiya İttifaqına üzv olan dövlətlərlə Rusiya arasında keçilməz sədlər yaranır:

"Xarici işlər naziri Sergey Lavrov yaxın günlərdə Almatıda olarkən, çox ciddi şəkildə Qazaxıstana öz iradlarını bildirdi. Son zamanlarda Qazaxıstanın ABŞ-la bir sıra müqavilələr imzalaması, viza rejimini sadələşdirməsi və ABŞ-ın Əfqanıstandakı hərbi qüvvələrinə logistik dəstək verməsi Rusiyanın etirazına səbəb olur. Rusiya o cümlədən, bir sıra məsələlərə görə, Belarusla da fikir ayrılıqları yaşayır. Ən yaxın müttəfiqi olan Ermənistanda hakimiyyətə Qərbyönümlü siyasi qüvvələrin gəlməsi də, Rusiyanın bu ölkə ilə olan münasibətlərinə mənfi təsir göstərir”.

Eldar Namazov qeyd edib ki, həmin ölkələrdən fərqli olaraq, Azərbaycan isə Rusiya ilə münasibətləri qoruyub saxlamağa çalışır: "Digər yandan da, Azərbaycanın Rusiya qarşısında öhdəliyi yoxdur. Azərbaycan Rusiya ilə heç bir hərbi-siyasi və iqtisadi blokda təmsil olunmur. Bu baxımdan, Rusiya onunla eyni blokda təmsil olunan ölkələrə öz iradlarını bildirə bilər. Bu iradları da bildirir və buna görə də, həmin blokların içində dərin çatlar yaranıb.

Azərbaycan müstəqil dövlətdir və öz milli maraqlarına uyğun siyasət yürüdür. Rusiya Azərbaycanın həyata keçirdiyi beynəlxalq layihələrdən, yaxud, öz ərazilərini işğaldan azad etməyə yönəlik atdığı addımlardan narazı ola bilər, amma onun Azərbaycanın bu fəaliyyətinə qarşı çıxmağa hüququ yoxdur. Buna görə də, Rusiya ancaq eyni bloklarda təmsil olunan dövlətlərə söz deyə bilər”.

TANAP məsələsinə gəlincə, politoloqun sözlərinə görə, Rusiyanı burada narahat edən məsələ Türkmənistanın bu xəttə qoşulmaq ehtimalı ilə bağlıdır: "Əgər dünyanın ən böyük qaz ehtiyatlarına malik olan ölkələrdən biri kimi Türkmənistan bu layihəyə qoşulsa, o zaman, TANAP Avropada Rusiya qazına ciddi rəqib kimi ortaya çıxacaq. Lakin bu Azərbaycanın müstəqil qərarıdır və Rusiyanın bunu dəyişdirə biləcəyinə inanmıram”.

Eldar Namazov bildirib ki, Rusiyanın həmçinin, bir neçə gün əvvəl Azərbaycan ordusunun Naxçıvan istiqamətində Ermənistanın təxribatına qarşı keçirdiyi əməliyyatlara etiraz etməsinə hüququ əsası yoxdur:

"Azərbaycanın öz ərazi bütövlüyünü bərpa etməsi, beynəlxalq hüquq normalarına uyğundur və bu, bizim suveren hüququmuzdur. Başqa sözlə, Rusiyanın istər TANAP layihəsinə, istərsə də Naxçıvan əməliyyatlarına görə Azərbaycana etiraz etməməsi başa düşüləndir. Hər halda Rusiya Azərbaycanın müstəqil dövlət olduğunu qəbul edir”.