Ceyhun Bayramov: Laçın sakinləri evlərinə qayıdacaq

Xarici işlər naziri Ceyhun Bayramov Laçın şəhəri, Zabux və Sus kəndlərinin Azərbaycana qaytarılması ilə bağlı paylaşım edib.
 
Nazir bu münasibətlə Azərbaycan xalqına təbriklərini çatdırıb.
 
"Laçın artıq Azərbaycanın nəzarəti altındadır. Buna görə də Azərbaycan xalqını təbrik edirəm. 1992-ci ildən bəri zorla sürgün edilən şəhər sakinləri evlərinə qayıdacaq. Laçın digər azad edilmiş ərazilər kimi yenidən bərpa olunacaq",- paylaşımda deyilir.

Azərbaycan Prezidenti İlham Əliyev özünün tviter hesabında avqustun 26-da yazıb ki, Azərbaycan Ordusu Laçın şəhərinə yerləşib.

"Bu gün, avqustun 26-da biz – Azərbaycanlılar Laçın şəhərinə qayıtmışıq. Azərbaycan Ordusu Laçın şəhərinə yerləşdi. Zabux və Sus kəndləri nəzarətə götürüldü. Bütün Laçınlıları və Azərbaycan xalqını bu münasibətlə təbrik edirəm. Yaşasın Laçın! Yaşasın Azərbaycan!”- paylaşımda qeyd olunub.
 
Zabux və Laçında məskunlaşan ermənilərə oranı tərk etməsi üçün verilən vaxt dünən avqustun 25-də başa çatıb. Orada yaşayan bütün erməni ailələr artıq şəhərdən çıxıb. 
 
Azərbaycan Prezidenti Ermənistana Laçın və Zabuxu tərk etmək üçün avqustun sonuna kimi vaxt vermişdi. Ermənistan hökuməti Laçından çıxarkən evlərini yandırmayan erməni ailələrinə qonorar və əlavə bir müddət pul mükafatı verəcəyini vəd edib.

www.anews.az